На просторот пред спортскиот центар „Борис Трајковски“ деновиве, како и секоја година, повторно е поставен забавен парк, кој како што алармираа од Град Скопје, е поставен без соодветни документи и дозволи и без потребна документација која гарантира безбедност на реквизитите.

Пред три дена градоначалничката Данела Арсовска посочи дека станува збор за фирмата „Дизниленд реквизити“ и дека Град Скопје, во рамките на своите надлежности извршил надзор, преземал мерки и го казнил правното лице, кое и покрај тоа си продолжило со работа. Таа ги повика сите надлежни институции да постапат во најкус можен рок, бидејќи се доведува во прашање безбедноста на децата и на сите останати посетители.

Денеска на Фејсбук се огласи техничкиот министер Панче Тошковски кој информира дека постапувајќи по допрен глас, Единицата за економски и компјутерски криминал при СВР Скопје во координација со службени лица од Државниот пазарен инспекторат, Управата за јавни приходи и градежен инспектор од Општина Карпош излегла на терен и презела конкретни соодветни мерки и активности од делокругот на својата надлежност и овластувања.

Од страна на инспекциските служби по преземените мерки и активности и констатираната фактичка состојба изготвени се Записници за констатирана состојба додека од страна на овластен градежен инспектор од Општина Карпош поведена е постапка за констатираните неправилности, по што ке бидат преземени конкретни мерки во насока на отстранување на истите, престанување со вршење на активноста, како и дислоцирање на реквизитите – соопшти Тошковски.

Забавниот парк од саботата до денес работи со полн капацитет, а во вечерните часови е полн со посетители, пред сѐ деца и млади. Во моментов никој не гарантира за нивната безбедност. Да се надеваме дека годинава нема да се повтори истото што се случува секоја година – и покрај апелите и непоседувањето на дозволи Луна паркот непречено да си работи цела летна сезона.