Роџер Дејл Пархам бил уапсен кон крајот на 1998 година под обвинение за силување малолетник. Описот на ФБИ гласел: Исклучително шармантен маж, човек со необично занимање, продавач на антиквитети, веројатно заинтересиран и за фотографирање. Злосторството наводно се случило во Арканзас, каде судот го ослободил 52-годишникот со кауција. Потоа било закажано „судење по различни кривични пријави“, соопшти полицијата подоцна.

Но, сепак, работникот – кој често барал да биде платен во готово – исчезнал. Се сметало дека тој ја напуштил областа за да избегне кривично гонење, соопшти полицијата. Судот издаде налог за апсење на Пархам, објави ФБИ, а неколку месеци подоцна тој бил обвинет за бегство, пишува Си-Ен-Ен.

Во раните фази на потрагата по бегалецот, друга потрага почнала да добива облик на мистерија. Втората потрага, далеку од Акранзас, била започната на езеро познато по дивиот свет, пловењето со брод и планинарењето.

Како и потрагата по Пархам, така и решавањето на оваа истрага зависела од полициските оддели. На крајот, се откриле нови прашања за кои биле потребни години за да се решат.

Но, ништо од тоа не било јасно во мај 1999 година, кога двајца рибари во Кентаки дошле до чудно откритие. Телото требало да потоне во езерото Баркли. Кој и да бил, бил врзан со тешки синџири, соопшти полицијата. Како тоа да не било доволно, телото исто така било закотвено со хидраулична дигалка.

Но, дури и тогаш, на почетокот на новиот век, иследниците имале на располагање само традиционални техники, соопшти полицијата. А тие алатки не биле доволни за да се идентификуваат посмртните останки. Така, анонимното тело го складирале на безбедно место и продолжиле со полициската работа.

За цело време, полицијата во округот Себастијан, Арканзас, продолжила да го бара Роџер Дејл Пархам. „Можеби отпатувал во Мексико“, напишале ФБИ на потерницата. На фотографијата бил прикажан бегалец од 1997 година: бел, кафеава коса, сини очи. Секој кој имал информации за Пархам бил советуван да се јави во нивната локална канцеларија на ФБИ или најблиската американска амбасада или конзулат.

Немало трага од Пархам повеќе од една деценија. Меѓутоа, тогаш се појавиле нови информации во случајот со уште едно исчезнато лице, или барем така изгледало.

Со ДНК анализи, стоматолошки записи, форензичка патологија и други напредни форензички тестови на дофат на раката, полицијата во Кентаки ексхумирала тело извлечено од езерото Баркли во 2016 година, со надеж дека понатамошното тестирање ќе помогне во идентификацијата. Но, ниту една од овие техники не била успешна, полицијата рече: „Жртвата остана неидентификувана“.

На почетокот на 2017 година, властите презеле уште еден нов чекор: внесување профил на посмртни останки во Националниот систем за исчезнати и неидентификувани лица. Извештајот на една страница содржел повеќе детали за жртвата која била откриена како „плови во езерото Баркли“.

Тој бил на возраст меѓу 35 и 50 години, бил висок помеѓу 167 и 185 см и тежел од 106 до 115 килограми, се вели во извештајот.

Потоа, на почетокот на оваа година, државната полиција на Кентаки ангажираше приватна лабораторија специјализирана за форензичка генеалогија, која ги комбинира податоците од ДНК со традиционалната генеалогија – често користејќи јавни документи за создавање семејни стебла – за да пронајдат биолошки врски меѓу луѓето.

Напредното генеалошко ДНК тестирање на остатоците од езерото Баркли од страна на приватната лабораторија Отрам и Националниот систем за исчезнати и неидентификувани лица откри поврзаност со роднина на неидентификуваниот маж, соопшти полицијата.

Истражувачите ги поврзале генеалошките точки и успеале да ги идентификуваат остатоците. Телото му припаѓало на Роџер Дејл Пархам. „До сега“, објави државната полиција во Кентаки, „исчезнувањето на Пархам беше мистерија“. Малку повеќе истражувања ги доведоа инспекторите назад во Арканзас и сознанието дека Пархам го чека судењето. Потрагата конечно заврши.

Сепак, причината за смртта на Пархам останува неутврдена, соопшти полицијата. А со оглед на состојбата во која е пронајдено неговото тело, случајот стар четврт век роди уште една мистерија. „Поради сомнителните околности во кои се наоѓаат останките, овој случај се истражува како убиство“, соопшти полицијата.