Денеска се одиграа четири натпревари од 33 коло во Првата македонска фудбалска лига (ПМФЛ), екипата на Брера Струмица останува прволигаш по победатад над Работнички.

На стадионот „Младост“ во Струмица играчите на Брера го совладаа Работнички со 3:2.

Во 15 минута домаќините поведоа со голот на Ндзенгуе, а предноста ја зголеми Велков во 28 минута.

„Романтичарите“ намалија во 32 минута преку Лазаревиќ, а во 58 минута за 3:1 се погрижи Ѓоргиевски од пенал. Работнички до крајот на мечот успеа само да го ублажи поразот во 82 минута кога стрелаше Николовски.

Екипата на Беса 1976 ќе игра бараж иако триумфираше над Пелистер со 4:1 на гости.

После првото полувреме Беса 1976 водеше со погодоците на Алими во 14 и Селмани во 26 минута.

Љамалари во 48 минута го постигна третиот гол, битолската екипа намали на 3:1 во 63 минута преку Тарасенко, а конечниот епилог го постави Али (75`) за потврда на победата.

Шкендија и покрај поразот од 3:1 од претходно веќе ја обезбеди шампионската титула, додека Тиквеш и Струга ремизираа 3:3.