За да може една плоча од вашата колекција да се продаде за висока цена, мора да бидат исполнети три услови: да е стара најмалку 40 години, да е добро сочувана и да не била издадена во голем тираж. Овие непишани правила се потврдуваат со августовската топ-листа на најскапо продадени албуми.

Најголемата светска онлајн платформа за продажба на сите видови носачи на звук, „Дискогс“, ја објави листата на најскапо продадени плочи во август.

На прво место се најде „Xanadu“ – промотивен 10-инчен винил со фотографија на Оливија Њутн Џон и песна на групата „Електрик лајт оркестра“ на другата страна. Вредноста му е 6.500 долари. Ова ретко издание е испечатено во 1980 година во само триесетина примероци (наводно точно 31). Било повлечено на барање на пејачката, која не била задоволна од фотографијата. Иако се сметало дека не било можно да се порача тираж помал од 300 копии, голем дел од изданието, според наводите, веднаш бил уништен. Токму затоа преостанатите примероци денес вредат илјадници долари, а рекордната продажба некогаш достигнала и 9.000.

На второ место е легендарниот албум на „Пинк Флојд“ – „Wish You Were Here“. Се работи за специјалната „Суперкат“ верзија, наменета за Хај-фај ентузијасти, достапна единствено по пошта преку списанието „Хај-фај тудеј“. Изданието го направила издавачката куќа „Нимбус“, специјализирана за класична музика, со уникатно ремастерирање на оригиналните траки. Цената била 6.450 долари.

Трето место заземаат „Битлси“ со својот прв албум од 1963 година – „Please, Please Me“. Станува збор за издание повлечено од продажба поради грешки во печатот: погрешни етикети во боја, неправилно наведени издавачки права и различна позиција на авторот на фотографијата. Токму овие грешки ја зголемија реткоста и цената, која во август достигна 4.800 долари.