Славниот шпански тенор и диригент Пласидо Доминго на 14 март ќе одржи концерт во арената „Борис Трајковски“. Со него ќе настапи и Марија Хозе Сири – една од водечките сопрани во светот, заедно со оркестарот на Народната опера и балет. Диригент ќе биде Жорди Бернасер од Шпанија.

Директорот на НОБ Оливер Арсовски на денешната прес-конференција нагласи дека овој концерт е шанса за позиционирање на државата на светската сцена. Концертот ќе се одржи во арената „Борис Трајковски“ со почеток во 21 часот. Овој концерт го организира Народната опера и балет со „Прагма продукција“.

Арсовски потенцира дека маестро Пласидо Доминго има кариера што се протега 50 години и е заслужен дел од светската оперска уметност. Досега имал повеќе од 150 солистички улоги, над 4.400 настапи и околу 600 настапи како диригент. Доминго, како што рече, е едно од најпочитуваните имиња во класичната музика, освојувајќи безброј признанија, вклучително и 12 награди Греми. Доминго бил член на Тројцата тенори, режисер, диригент, почесен уметнички директор на Стогодишниот фестивал Арена ди Верона и генерален директор на Операта во Лос Анџелес и на Националната опера во Вашингтон.

– Марија Хозе Сири е драмски сопран број еден во светот – посочи Арсовски. Потсетувајќи дека имала над 150 настапи, а во 2010 година настапила на Мајските оперски вечери.

Концертот ќе го диригира шпанскиот диригент Жорди Бернасер, кој од 2012 година соработува со Пласидо Доминго. Тој е еден од врвните шпански диригенти.

Оперскиот концерт ќе има два дела. Во првиот дел ќе биде со дела од италијанската музичка литература, а во вториот дел ќе биде проткаен со шпанското музичко творештво и со неколку арии од оперетите на Штраус и на Лехар.

Тој најави дека продукцијата и озвучувањето ќе биде перфектно и додаде дека ова не е прв концерт на Пласидо Доминго во спортска сала.

– За една мала земја како што сме ние, ова е од големо значење. Маестро Доминго нѐ почитува и како земја, тоа може да го видите во изјавите, и без никакво наше нагласување, земјава ја претстави како Македонија, во сите негови изјави и на неговата официјална веб-страница – рече Стефановски и изрази благодарност до Министерството за култура и туризам и Националната опера и балет за поддршката и до генералниот спонзор „Алкалоид“.

Преку видео се обрати Пласидо Доминго, кој изразува задоволство што ќе настапи во нашата држава. Пласидо најавува дека концертот и неговата програмата ќе разбудат радост, емоции и смеа што публиката долго ќе го памети.

Маестро Пласидо Доминго ќе пристигне во Скопје неколку денови пред концертот, на 11 март, по што ќе има две проби со оркестарот и со хорот на Операта. Генералната проба ќе биде во арената „Борис Трајковски“.

Билетите повеќе од три месеци се во продажба и во соседните земји, со цена од 2.000 до 5.000 денари. Досега над 500 билети се продадени во Бугарија.