Националниот парк Шар Планина и планинарските клубови од тетовско-гостиварскиот регион денеска потпишаа Меморандум за соработка, со цел како што истакнаа поголема координација и унапредување на животната средина.

Промоција на заштитата на природата, одржливиот економски потенцијал, подигање на јавната свест и свесност за убавините на Шара, планинарски патеки, еколошки акции, размена на знаење и искуства е сето она што го нуди Меморандумот.

Од установата, велат дека сите места за пешачење и планинарски патеки ќе се најдат и на интернет платформа и секоја патека ќе се регулира и оцртува во координација со надлежните од НП Шар Планина.

„Првично се договораат со нас за одредена патека, не како досега, ако му текнало на одредено здружение па ќе почне да обележува патека затоа што им било интересно. Секако во координација со нас, што е важноста за таа патека, кој предел ќе се опфати, што ќе промовира од убавините на Шара преку таа патека, секако тоа ќе треба да биде опфатено во електронското евидентирање, изјави директорот на НП Шар Планина, Ибрахим Дехари.

Меморандумот според планинарските клубови ќе придонесе за поголема промоција, но и зачувување на туристичкиот потенцијал на Шар Планина.

„За поздравување е овој чин на Националниот Парк. Голема важност имаат патеките, за движење од безбедносен аспект но и за развој на туризмот, да знае секој посетител што и каде може да посети на таа патека. Без лиценциран планинарски водич да не се оди на планина, истакна Снежана Новаковска, од ПК Тетекс, која денеска се потпиша на Меморандумот.

Наскоро се очекува во НП Шар Планина да се започне со уредување на излетничките места, ќе се постават и патокази, знаци како и мостови и привремени објекти наменети за потребите на чуварската служба.