Употребата на уставното име на Северна Македонија е нешто што е договорено во контекст на Договорот од Преспа, изјави портпаролката на Европската Комисијата за соседска политика и проширување Ана Писонеро.

На новинарско прашање дали Комисијата знае дека некои македонски политичари не го користат уставното име и каква е нејзината реакција, Ана Писонеро рече дека ЕУ изрази жалење „за неупотребата на уставното име на државата од страна на некои од лидерите на Северна Македонија. Ова нешто е јасно договорено како дел од договорот од Преспа. И јасно е дека сите страни мора да ги почитуваат условите на договорите и да ги спроведуваат со добра волја“.

„Од наша страна, му честитавме на премиерот Мицкоски и на новите министри по формирањето на коалициската влада во Северна Македонија. ЕУ тесно ќе соработува со новата влада за да постигне напредок во значајните реформи и да го унапреди патот на Северна Македонија кон ЕУ, мислам дека пораката е јасна“, додаде таа.

Портпаролката посочи дека „Северна Македонија мора максимално да го искористи моментумот што постои за проширувањето за да продолжи одлучно на својот пат кон ЕУ. Сите добро знаете дека Европскиот совет јасно кажа што очекува од Северна Македонија. И очигледно ова е поврзано и со уставните амандмани што Северна Македонија суштински се обврза да ги направи за да може да оди напред на својот пат кон Европската Унија.

Вчера јасна порака до новото раководство на државава дека предуслов за европскиот пат на Северна Македонија е почитувањето на Договорот од Преспа, испрати на високиот претставник на ЕУ, Жозеп Борел .

Интервенцијата на Борел се случи по брифингот на грчкиот министер за надворешни работи Јоргос Герапетритис пред Советот на министри за надворешни работи на ЕУ за последните предизвици на раководството на ВМРО-ДПМНЕ.

„Принципот pacta sunt servanda (она што е договорено мора да се почитува) е предуслов за европската перспектива на Западен Балкан“, појасни Жосеп Борел во своите изјави.

Предходно шефот на грчката дипломатија во Советот на министри го истакна „деликвентното однесување на Скопје од изборите и укажа на јасното толкување на Договорот од Преспа, кое важи за сите (ерга омнес)“, пишуваат грчките медиуми повикувајќи се на дипломатски извори.

Селективната примена на меѓународното право, подвлече, е недозволива и заклучи дека иднината на Западен Балкан е во Европа, но основен услов е верното почитување на европското законодавство и меѓународното право.

На работниот ручек на европските министри за надворешни работи со нивните колеги од Западен Балкан, грчкиот министер за надворешни работи според истите информации повтори дека европската перспектива е еднонасочна улица, но таа треба да се заснова на интегритет и исти перформанси на државите на следните три нивоа: европско законодавство, почитување на основните правила, демократија, владеење на правото, заштита на малцинствата и верна примена на меѓународното право.