Под мотото „Вештачка интелигенција за Владата, природна забава за народот“, вчеравечер по 28. пат во Арената „Борис Трајковски“ се обединија најинтересните и најзабавните изведувачи на македонската јавна сцена, по повод најпопуларната домашна манифестација „Златна Бубамара на популарноста 2025“.

Создадена со внимателно набљудување на настаните кои ја одбележаа изминатата 2024 година, од страна на првиот човек на „Бубамара“ Ранко Петковиќ, со многу хумор и одлична музика, во жесток ритам, со околу 100-тина учесници од земјата и од регионот, илјадниците присутни во Арената четири часа уживаа во хуморот на македонските актери, водители на манифестацијата, Сашко Коцев и Тино Костадиновски.

Организаторите и оваа година останаа доследни на својата критична мисла за актуелните случувања во државата и на еден хумористичен начин ги претставија проблемите од нашето секојдневие.

Вечерта традиционално ја отвори Ранко со воведен говор, по што следеше краток стенд-ап настап на актерот и комичар Жарко Јовановиќ, кој со својот хумор и имитација на актуелните политичари, ја загреа атмосферата во салата.

Првата Златна бубамара беше доделена на Ана Петановска за најдобар и најперспективен вокал, а честа да ја врачи оваа награда, по цели 26 години, ја имаше Сашо Гигов – Гиш. Двајцата заедно го отпеаја безвременскиот евергрин „Моја гитара“, предизвикувајќи емотивни реакции кај публиката.

Наградата за животно дело ја доби Перо Христов, кој допатува од САД за да ја подигне наградата, ја отпеа „Нема живот Ангелино“ и со поклон ѝ оддаде почит на публиката.

Наградата за трајни музички вредности отиде во рацете на Дарио кој ги испеа легендарните „Дупла вотка“, „Дај да заспијам“ и „Косоока“.

Наградата за 30-годишниот јубилеј ја доби К-15, а врачувањето на Златната бубамара беше проследено со громогласен аплауз.

За хит на годината беше прогласена песната „Океани“ на „Некст тајм“ и Слаткар, а по нив следеа и доста емотивни моменти кои го одбележаа 28. издание на Златната бубамара.

Пискотот на зурлите, грмежот на тапаните, и „Тешкото“ во изведба на Игор Џамбазов, добија стоечки овации.

Додека пак, од златното грло на Сузана Спасовска беа изведени стари македонски песни. На видеобимот беше пуштен инсерт од нејзин стар концерт со починатата Васка Илиева, каде Сузана ѝ ветува дека ќе ја негува и чува македонската музика, а потоа ја отпеа песната „Судбо моја“, по која доби стоечки овации, и ја прими наградата – Трајни музички вредности.

Казухиро Котецу, кој е голем обожавател на ликот и делото на Јонче Христовски, допатува дури од Јапонија за да присуствува на „Златна Бубамара“. Ја отпеа легендарната „Ако умрам ил загинам“, по што ја доби и наградата – Амбасадор на македонската култура.

Со ѕвездено небо, овации и громогласен аплауз беше почестена пејачката Калиопи која заедно со публиката отпеа неколку свои хитови, а доби и три златни статуетки за поп концерт, пејачка на годината и албум на годината.

Посебна почит им се оддаде на Атина Апостолова, Константин Икономов, Лазар Лечиќ, Велибор Џаровски – Џаро, Љупчо Константинов, Анка Гиева, Мирко Попов, Оливера Николова и Снеже Стамеска, кои изминатата 2024 нè напуштија.

Златни статуетки добија и Битолскиот камерен оркестар, Театарска претстава за деца и младинци – „Роња“, за Трајни вредности – Миро Масин, за Спортска легенда – Илија Најдоски, Етно концерт – Ансамбл Стефче Стојковски, Актерка за 2024 – Дарја Ризова, Актер за 2024 – Ѓорги Јолевски, Театарска претстава – 12, Рок група за 2024 – Меморија, Рок концерт 2024 – Меморија, Писател 2024 – Тихомир Јанчовски, и за Животно дело Муарем Сербезовски.