Зоолошката градина во Скопје наскоро ќе добие нови жители. Како што информираат оттаму, дел од птиците во заливот на пингвините извеле јајца врз кои во моментов лежат во надеж дека наскоро ќе изведат бебиња пингвини.

– Дел од овие прекрасни птици изведоа јајца и сега се постојано во своите гнезда каде лежат врз потенцијалните бебиња. За да ја зголемиме шансата да имаме за првпат малечки од овој вид, не сакаме да ги вознемируваме и да го чистиме базенот во наредните две недели. Водата е зелена поради сонцето и создавање на алги, но е исправна технички и микробиолошки, а пречистителната станица постојано функционира. Овој вид на птици е загрозен и е на црвената листа на видови во исчезнување, а со доаѓањето на свет на малечките ќе придонесеме во продолжување на видот – информираат од ЗОО Скопје.

Од Зоолошката градина апелираат до посетителите да не тропаат по стаклата и да не фрлаат храна во базенот и живеалиштето се со цел да не ги вознемируваат птиците.