Моите оценки за ситуацијата во Србија сега се поостри, но добро е – без оглед на тоа што постојат разлики – што е воспоставен дијалог, рече известувачот на Европскиот парламент за Србија, Тонино Пицула во интервју за Хина во средата, резимирајќи ја својата тридневна посета на Белград и Нови Сад, без да биде преголем оптимист дека е можен побрз напредок на Србија во европската интеграција.

„Собрав многу вредни информации разговарајќи директно со луѓе кои се протагонисти на политичкиот и општествениот живот. Сигурно е дека моите оценки се попрецизни, а добив и потврда за некои мои претходни впечатоци и сигурно е дека тоа ќе влијае на понатамошната подготовка на извештајот“, изјави Пицула.

Изминатите три дена ги помина во својата прва посета на Србија откако беше назначен за известувач за ЕП во октомври, но пропушти некои состаноци – со српскиот претседател Александар Вучиќ, премиерот во заминување Милош Вучевиќ и министерот за надворешни работи Марко Ѓуриќ.

„Им беше понуден разговор, но тие не го прифатија, но разговарав со претставници на парламентарната коалиција на владејачките партии и со претседателот на Собранието, што беше доволно за да ја заокружам позицијата на владата во Србија. Тоа што некои луѓе не го прифатија едноставно не е моја вина – јас сум човек на дијалог, тие очигледно оценија дека не им треба таков тип на комуникација, што мислам дека е пропуштена шанса“, оцени Пицула.