Министерката за одбрана Славјанка Петровска во денешното интервју на ТВ21 во емисијата „Клик плус” уште еднаш го најави Конкурсот за прием на нови 200 професионални војници кој биде објавен во септември. Таа потенцира дека интересот за ова професија од година во година е се поголем и како за споредба кажа дека во 2017 година за едно место имало речиси двајца кандидати, а на последниот конкурс за едно место имало 9 кандидати.

„Тоа покажува дека сериозно расте интересот и веројатно атрактивноста на професијата професионален војник ја зголемуваат и придобивките од подобрувањето на условите за извршување на таа задача, покрај ова што до сега го зборувавме во делот на модернизација и набавување на опрема, затоа што тоа е тоа што им е потребно на војниците. Се работи многу на подобрување на условите за работа во кои работат и професионалните војници, но се разбира и сиот цивилен и воен персонал во Армијата кој е опфатен со Законот за служба во Армијата“, рече Петровска.

Министерката вели дека ако погледнеме од перспектива на првите луѓе во одбраната, првиот министер за одбрана, началник на Генералштаб и претседател на држава во овие изминати 30 години, тие сигурно се горди на она што денес е постигнато односно на она што денес го имаме како Армија и како дел на одбранбениот систем во нашата држава.