Министерката за одбрана Славјанка Петровска учествуваше на панел посветен на развојот на технологијата, организиран од Воената академија „Генерал Михаило Апостолски”.

Како што соопштија од Министерството, Петровска говорела за влијанието на технологијата врз безбедноста и потребата да се задржи технолошката предност, како и постигнувањето на целосна технолошка интероперабилност.

Со развојот на новите технологии ние можеме да изнајдеме решенија за различни проблеми и предизвици, од загадувањето на воздухот и климатските промени, до предизвиците во сајбер-просторот. Но, онака како што овие технологии го обликуваат начинот на кој комуницираме и ја зголемуваат нашата ефикасност, така тие нè прават и поранливи. Нашата зависност од технологијата побарува изградба на функционален, одржлив и отпорен технолошки одбранбен систем, рече министерката.

Таа истакнала дека клучни во развојот и одржувањето на технолошката предност се единството, солидарноста и кохезијата помеѓу сојузниците.

Форумите како денешниот каде разменуваме знаења, најдобри практики и експертиза се витални за технолошкиот развој во Алијансата. Мораме да останеме обединети и да си помогнеме меѓусебно на ова поле, додаде министерката.

Панелот е дел од активностите на Организацијата за наука и технологија на НАТО, а учесници се 60 претставници од сојузничките земји.