Годишниот извештај за работата на Судскиот совет на Република Северна Македонија стар две години ги скара власта и опозицијата за состојбите во судството. Опозициските пратеници сметаат дека состојбите во судската власт се исклучително лоши, оти судовите се неажурни и под големо политичко влијание од власта, а пратениците од владејачките партии сметаат дека времето на политички влијанија во судството поминало со заминувањето на претходната власт.

Натали Петровска од коалицијата „Сите за правично судење“ вели дека невоедначеноста на судската практика е проблем кој се среќава во нашите судови веќе подолг период, но за жал освен краткотрајниот и привремен обид за решавање на овој проблем преку Законот за одмерување на видот и висината на казната, не се направени посериозни чекори за негово надминување.

– Како потврда за ваквата состојба се и истражувањата на Коалицијата „Сите за правично судење“, согласно кои е утврдено целосно различно постапување помеѓу различни апелациони подрачја, различни судови, па дури и различни судии во истиот суд. Така, освен формалната структура на пресудите, може да се забележи сосем различно толкување на законите, применување на различна правна логика во однос на утврдување на фактичката состојба и постоењето на некое кривично дело, големи разлики во утврдените санкции за исти кривични дела, формалистичко и рестриктивно толкување на одредбите, отсуство на примена на одредби од меѓународни конвенции, како и отсуство или различна примена на ставовите на Европскиот суд за човекови права, изјави Петровска за „Слободен печат“.

Во контекст на ова, додава таа, мора да се напомене и дека официјалните надлежни органи, како Судскиот совет и Врховниот суд, не прибираат и не обработуваат податоци кои се однесуваат на воедначеноста на постапувањето на судовите, особено во насока на воедначена примена на практиката на Европскиот суд за човекови права.