Дополнителната заменик министерка во Министерството за финансии Елена Петрова од редовите на ВМРО-ДПМНЕ предупредува дека Владата донела незаконска одлука за ангажирање на 459 лица со договор на дело во јавни здравствени установи.

-На седница одржана на 27 февруари годинава владата постапувала по Известување од МФ за вработување на нови лица во случај на итни и неодложни работи во ЈЗУ. По насоките од Владата, МФ на 12.03.2024 год.доставило до ФЗО известување за обезбедени финансиски средства за ангажирање на 459 лица со договор на дело во триесет и пет ЈЗУ. Ова Е СПРОТИВНО на Изборниот законик, според кој по распишување на изборите за итни и неодложни работи се дозволува САМО ВРАБОТУВАЊЕ НА ОПРЕДЕЛЕНО ВРЕМЕ. Тоа е постапка која се спроведува со јавен оглас на кој може да учествуваат заинтересирани лица и да биде избрано лице кое ги исполнува условите. Договорот на дело пак е однос кој се воспоставува со определено лице, без можност да се вклучат повеќе заинтересирани лица, пишува заменичката министерка Петрова.

Таа додава дека според Изборниот законик, како итни и неодложни работи се дозволени вработувања по распишување на изборите САМО ВО ТОЧНО ОПРЕДЕЛЕНИ СЛУЧАИ: замена на отсутен работник поради подолго боледување или отсуство, смрт на вработен и сезонски работи.

-Дали 250-те медицински лица и 209 лица од друг персонал (преведувач, статистичар, дактилограф, општ работник и т.н.) се за замена на отсутни или починати вработени и за сезонски работи?, прашува Петрова и додава дека нејзина надлежност и обврска е да се грижи за законито користење односно располагање со буџетските средства во овој период кога се распишани изборите и е формирана преодна Влада заради организација на изборите.

Токму заради наведената повреда на Изборниот законик и Законот за спречување на корупцијата и судирот на интересите Петрова најави дека ќе поднесе пријава до Државната комисија за спречување на корупцијата.