Невремето и поплавите во најпознатиот овоштарски регион во Италија, Емилија Ромања, предизвикаа огромни и потенцијално долгорочни штети, рекоа земјоделците, предупредувајќи дека цените на овошјето може значително да пораснат. Бербата на овошје во регионот покрај Јадранското Море може да биде сериозно загрозена во следните четири до пет години, објави во неделата земјоделското здружение „Колдирети“, пренесува Хина. Поради водата што останува во овошните насади, корените скапуваат, објаснуваат тие, оценувајќи дека загрозени се речиси 15 милиони овошни дрвја. На одредени насади треба да се искорнат сите овошни дрвја и да се засадат нови, што во голема мера ќе влијае на цените на овошјето, вели Колдирети. Емилија Ромања важи за главен италијански овоштарски регион, каде што се одгледуваат кајсии, нектарини, сливи, јаболка, круши, киви и јагоди, потсетува Дпа. Загрозено е производството на најмалку 400.000 тони пченица, а полињата со пченка, сончоглед и соја се целосно покриени со дебел слој кал, предупредуваат од здружението. Во Емилија Ромања, сточарството исто така претрпе огромни штети, истакнува Колдирети, додавајќи дека уште треба да се спасат околу 250.000 говеда, свињи и овци.