Директорот на српската владина Канцеларија за Косово и Метохија, Петар Петковиќ, кој моментално се наоѓа во Косовско Поморавље, изјави дека ја завршува посетата на Косово, како што изјави поради тоа што „му е забрането 80 отсто од предвидената програма”, иако неговата посета била целосно одобрена,

-Погледнете до каде оди Албин Курти, тој сега удира по славските свеќи и славските колачи. Не само што ми забранува да одам во манастирите во областа на Косово и Метохија, туку сега ми забранува да присуствувам и на каква било верска церемонија. Нека се договорат прво во Приштина каков мејл да ми праќаат. Дали првиот го праќа Курти, а вториот (Бесник) Бисљими бидејќи очигледно секогаш се нервозни кога треба да дојдам на просторот на КиМ и очигледно не спијат затоа што секогаш ми праќаат мејлови околу полноќ, точно во глуво доба од ноќта кога сиот чесен и нормален свет одмара, рече Петковиќ.

Според планот на Петковиќ, тој требаше утре да го посети Лепосавиќ на одбележувањето на славата Света Петка.

Во меѓувреме, претседател Александар Вучиќ за утре во 10 часот закажа седница на Советот за национална безбедност, јавуваат медиумите. Од прес-службата на Вучиќ за 9 часот најавија средба со претставници на Српската листа од Косово.

Вучиќ реагираше на писмото што денес му го испратија претставниците на Српската листа кои побараа средба со него.

Српската листа побара средба пред 31 октомври, кога истекува рокот за пререгистрација на возилата со таблички издадени од Србија.

Српската листа предупреди дека изјавите на косовскиот премиер Албин Курти пред истекот на рокот 31 октомври „јасно укажуваат дека во Приштина нема волја за изнаоѓање решение и компромис, туку само желба за предизвикување криза и тензии, особено во северот на Косово и Метохија”.