Иако до новогодишните и божиќните празници има уште неколку дена, на улиците веќе сега може да се слушне пукањето на петарди и на слични експлозивни направи, кои главно ги фрлаат децата.

Малите деца не се свесни дека со тоа го загрозуваат своето здравје, а и здравјето на другите, затоа лекарите апелираат до родителите да не им купуваат петарди „заради забава“. Објаснете им на децата дека петардите не се играчки и дека можат да им остават трајни последици. Поради неправилното ракување и невнимание може да дојде и до посериозни повреди и изгореници на лицето, рацете или очите, како и до оштетување на слухот.

Изгореници, исеченици…

Како што се наближуваат празниците и лекарите имаат сѐ повеќе работа, бидејќи зачестена помош бараат малите пациенти поради повреди кои се предизвикани од петарди.

Обично станува збор за поблаги повреди како исеченици, гребнатинки и изгореници од полесен степен, но за жал, има и посериозни повреди, кога страда кожата, рацете, прстите, ушите, односно слухот, лицето и очите. За жал, праксата на лекарите зборува дека не се ретки ниту ампутациите на прстите на раката, но и повредите на очите и на лицето, па детето мора да го однесете кај хирург.

Особно се опасни експлозивните направи кои децата сами ги прават. Тоа се најчесто стаклени шишиња во кои децата ставаат експлозив и тогаш ги активираат на одредена оддалеченост. Бидејќи доаѓа до распрскување, тоа може да доведе до уште потешки повреди од стакло.

Страдаат очите

Поради петардите често страдаат и очите, а повредите се многу посериозни од изгореници на капаците, до повреди на надворешните делови на окото, како на пример, рожницата.

Сите овие повреди можат да бидат исклучително сериозни, многу болни и бараат секојдневни преврски и одење кај лекар, а некои можат да предизвикаат трајни последици.

Прва помош

Поради тоа што најчести повреди се изгорениците, во тој случај би требало да знаете дека повреденото место од изгореници што побрзо треба да се излади.

Најдобро е повредениот дел на телото да го ставите под млаз студена вода или на изгореницата да се стави мокра студена крпа, бидејќи тоа го забавува понатамошното уништување на ткивото и ја ублажува болката.

Во вакви ситуации, не му ставајте мраз. Ако се работи за поголема изгореница задолжително однесете го детето кај лекар.