Фудбалерите на Атлетико Мадрид приредија фудбалска лекција во градското дерби и со убедливи 5:2 го совладаа Реал на „Ванда Метрополитано“ во дербито од 7. коло на Примера. Херој на мечот беше аргентинскиот интернационалец Хулијан Алварез, стрелец на два гола и главен двигател на „јорганџиите“.

Атлетико тргна жестоко и уште во 14. минута преку Робин Ле Норман стигна до водство. Реал успеа да израмни со погодок на Килијан Мбапе, а потоа преку Арда Гулер дојде и до пресврт. Сепак, пред паузата Александар Серлот со глава донесе 2:2 и наговести вистинска фудбалска драма.

Веднаш по стартот на второто полувреме, Алварез реализираше пенал и повторно го врати Атлетико во водство (3:2). Само 13 минути подоцна, Аргентинецот со мајсторски изведен слободен удар го совлада Куртоа за 4:2 и ја запали трибината. До крајот, Антоан Гризман со својот погодок стави печат на убедливиот триумф – 5:2, еден од најубедливите во ерата на Диего Симеоне.

Атлетико со оваа победа се искачи на четвртата позиција и го намали заостатокот зад Реал на само шест бода. „Кралевите“ пак, ризикуваат да ја загубат лидерската позиција доколку Барселона слави против Реал Сосиедад.