Шпанија останува на патот кон полуфиналето на Европското првество 2020. После триумфот над Германија од седум голови разлика, црвената „фурија“ денеска во Виена запиша и петтата победа од стартот на континенталниот собир, овојпат против Австрија со 30:26 (17:16).

Шпанците имаа контрола над натпреварот освен во неколку периоди кога Австрија беше во минимална предност (14:15, 27. минута), но од 19:18 домаќините повеќе не можеа да му парираат на поквалитетниот противник.

Шпанската одбрана го лимитираше Никола Билик на само три погодоци, а Јанко Божовиќ на пет, додека кај стрелците се истакна поранешниот член на Вардар, Хорхе Македа со шест голови.

Пред дербито од групата 1, помеѓу Хрватска и Германија, Шпанија е на првото место со шест бодови, пред Хрватите (четири), по два имаат Германците, Австријците и Белорусите, а Чешка без бодови.