Ако сте сопственик на мачка, веројатно сте се запрашале како таа може да добие болви, особено ако живее во затворен простор. Овие досадни паразити се многу вешти и секогаш ќе најдат начин да влезат во вашиот дом и да стигнат до миленикот, пишува „Телеграф“.

Ветеринарите откриваат пет најчести начини на кои мачките добиваат болви, дури и кога се чувани во затворено, и што можете да направите за трајно да се ослободите од нив.

Како мачките добиваат болви?

1. Престој на отворено

Во топлите и влажни летни месеци, болвите се размножуваат во сеновити и влажни средини. Доволно е мачката накратко да излезе надвор за да стапи во контакт со нив. Висока трева, жива ограда, грмушки и присуство на глодари се најчести извори. Болвите можат да преживеат во надворешната средина со месеци, чекајќи нов домаќин.

2. Контакт со други миленици

Најчесто болвите се пренесуваат меѓу животните во домаќинството или во соседството. Ако вашата мачка се дружи со друго животно, мачка или куче, ризикот е голем. Дури и ако едно животно има само неколку болви, јајцата и ларвите брзо се шират низ домот.

3. Заразување во самиот дом

И луѓето можат несвесно да пренесат болви – на обувки или облека. Штом ќе влезат во домот, болвите се кријат во теписи, постелнина или мек мебел, каде што може да преживеат месеци. Централното греење дополнително создава услови за нивно постојано размножување.

4. Посета на ветеринар или салон за миленици

Иако ветеринарните ординации и салоните за нега се чисти, таму престојуваат многу животни, што ја зголемува шансата за зараза. Ако ја носите мачката на вакви места или во пансион за миленици, секогаш користете превентивен третман против болви.

5. Болви на прозорци и врати

Болвите лесно можат да влезат во домот преку отворени врати и прозорци. Тие се доволно ситни за да се протнат незабележано, а мачката што се движи од дома кон надвор и обратно дополнително го зголемува ризикот.

Како да спречите зараза?

Превенцијата е секогаш подобра од лекувањето. Консултирајте се со ветеринар за најсоодветен третман – локални препарати, спрејови или специјални огрлици. Редовно проверувајте го крзното на мачката и обрнете внимание на темни ситни честички, тие укажуваат на присуство на болви.

Може ли човек да добие болви од мачка?

Болвите можат да скокаат и на луѓето, најчесто на нозете и глуждовите, иако не можат трајно да живеат на човек. Убодите предизвикуваат чешање, црвенило и оток, а кај алергични лица реакциите можат да бидат посилни. Лекувањето вклучува миење со антисептички сапун и користење ладни облоги или препарати против чешање, секогаш по консултација со лекар.