Дмитриј Песков, гласноговорникот на Кремљ, денес наведе дека американскиот претседател Доналд Трамп е “бизнисмен кој се обидува да го принуди светот да купува скапа американска нафта и течен гас”, пренесува Економик тајмс.

Песков, во интервју за руската радио станица РБК, посочи дека Трампа никогаш не ја криел својата намера да ги обезбеди економските интереси на САД.

„Претседателот Трамп никогаш не ја криел својата намера да ги обезбеди економските интереси на Америка. Најлесен начин е да го принуди целиот свет да купува американска нафта и течен природен гас по повисоки цени.” Според Анадолија, тој објасни дека Трамп ги постигнува своите цели со избегнување на софистицирани дипломатски маневри, користејќи наместо тоа директен финансиски притисок.

Понатаму, Песков потврди дека САД имале значителен успех во оваа намера.

„Американците успеаја да ги натераат Европејците да купуваат енергетски ресурси по надуени цени. Во голема мера успеаја”. Тој додаде дека “Многу европски држави прибегнаа кон купување течен природен гас по зголемени цени. Тоа им наметна дополнителен товар на нивните буџети и, следствено, ги оптовари џебовите на даночните обврзници”.

Ова, според него, довело до значителна нелагодност, наведувајќи го примерот на Германија.

„Кога Германците и Баварците почнаа да добиваат двојно поголеми сметки за струја, почнаа да се чувствуваат непријатно и тоа не им се допаѓа”, забележа тој. “Ова не се однесува само на Германија, туку општо на речиси сите (Европејци), иако можеби помалку на Франција, бидејќи најголемиот дел од производството на енергија доаѓа од нуклеарни извори. Но, сите други земји во голема мера зависат од нафтата и гасот”, подвлече Песков.

Како одговор на овие промени на пазарот, Русија, според Песков, успешно ги пренасочила своите енергетски текови кон алтернативни пазари.

„Потпишавме невиден договор со Кина, пресметан за многу години однапред. Не само што обезбедува добар извозен потенцијал за нашата релевантна компанија, туку служи и како силен двигател за развојот на сите региони по должината на Русија”, истакна Песков. Тој нагласи дека Европа повеќе не е премиум пазар за руската енергија. “Премиум пазари стануваат оние на Исток, а кој знае, можеби наскоро ќе се појават и некои други региони, овој процес е неизбежен”, заклучи Песков.

Во врска со спортот, Песков изјави дека политички мотивираниот третман на руските спортисти сè уште е присутен. На прашањето за пристапот до интернационалните настани, тој одговори дека е од огромна важност руските спортски тела да одржуваат дијалог со МОК (Меѓународниот олимписки комитет).

„Да, не се согласуваме со ставот на МОК. Веруваме дека политичката пристрасност кон нас сè уште постои, двојните стандарди сè уште постојат, концентрираните двојни стандарди сè уште постојат.” Сепак, тој додаде дека оваа неслога не е причина за прекин на релациите. “Но, тоа не значи дека треба да се лутиме, да се свртиме и да кажеме дека целосно ја прекинуваме комуникацијата”, рече тој.

Песков заклучи дека одлуката во врска со учеството под неутрално знаме мора да остане на самите спортисти