Третата рунда директни разговори меѓу делегациите на Русија и Украина ќе се одржи вечерва во Истанбул, а фокусот на разговорите ќе биде размена на меморандуми со предлози за мирно решение, објави денес портпаролот на Кремљ, Дмитриј Песков.

„Тема на разговорите првенствено ќе бидат прашања поврзани со нацрт-меморандумите што беа разменети за време на претходната рунда“, рече Песков, нагласувајќи дека координацијата на овие документи е клучна за евентуален самит меѓу лидерите на двете земји, пренесе Тасс.

Украинскиот претседател Володимир Зеленски претходно нагласи дека фокусот на преговорите треба да биде состанок на највисоко ниво, но Кремљ вели дека самитот би имал смисла само откако основните позиции ќе бидат дефинирани преку работни документи.

Руската делегација, чиј состав остана непроменет, ја предводи помошникот на претседателот Владимир Медински.

Планирано е да се разговара и за продолжување на процесот на размена на затвореници и тела на загинати, а Песков изјави дека, доколку е потребно, ќе бидат покренати и други прашања, за кои ќе одлучат шефовите на делегациите.