На Универзитетот „Гоце Делчев“ во Штип во тек е втората консултативна средба во врска со измените на Законот за локална самоуправа на која учествуваат градоначалници и експерти кои ќе разговараат за можните решенија со кои ова законско решение во иднина треба да овозможи општините да им обезбеднат подобри и поквалитетни услуги на граѓаните.

Министерот за локална самоуправа, Златко Перински пред почетокот на средбата посочи дека оваа е втора од четирите предвидени консултативни и јавни дебати, неопходни за да се направат предвидените законски измени со оглед на тоа дека постоечкиот Закон е постар од 20 години, ги издржал сите предизвици на времето и сега треба да се модернизира, усоврши и адаптирира согласно потребите и можностите на локалните самоуправи и на граѓаните.

Според него, сите забелешки и коментари кои денеска ќе се слушнат треба да се имплементираат во предлог на измените на Законот за локална самоуправа.

Сакаме да го зголемиме квалитетот на услугите што самите локални самоуправи ги испорачуваат кон граѓаните и секако да го подобриме квалитетот на живот на самите граѓани и секако во таа насока Министерството за локална самоуправа заедно со експертскиот тим поддржан од УНДП ќе продолжи да делува и понатаму – рече Перински.

Министерот додаде дека постоечкото законско решение е од 2002 година, се применува од 2005 година, производ е на еден многу макотрпен процес како што е Охридскиот договор и дека никој досега не се осмелил да го отвори ова како прашање.

Измените ќе се однесуваат на три главни постулати, првата е референдумска можност за отповик на градоначалник, на оној кој несовесно постапува или несовесно ја извршува својката функција, втората е да се воведе и препознае во Законот за локална самоуправа комуналниот редар, затоа што мора да се превенираат и тие, можеби во мал број, девијантни појави од граѓаните и третиот постулат е поголема вклученост на јавниот сектор затоа што на тој начин општините ќе можат да донесуваат позначајни и поиздржани решенија за граѓаните – изјави министерот.

На прашањето дали општините започнале да ги спроведуваат проектите за кои добија пари од унгарскиот кредит, Перински истакна дека повеќе од 200 општини ги имаат склучено договорите со кои треба да добијат финансиски средства за реализација на инфраструктурни проекти, а само два ќе треба повторно да се објават заради технички проблеми.

Задоволни сме од работењето на локалните самоуправи заради тоа што повеќе од 200 од вкупно 288 проекти што се контрактираа за да добијат средства од централниот Буџет, веќе се склучени договорите и ќе влезат во фаза на изведба. Само два од овие 288 договори ќе треба повторно да се објават заради технички проблеми поврзани со јавните набавки. Очекуваме со подобрување на временските услови, градежна и економска експанзија на целата територија, рече Перински.

Министерот очекува новиот повик да биде објавен на почетокот на февруари, а претходно во последната недела од јануари да помине на владина седница