Зголемените приходи од придонесите од новите вработувања го полнат пензискиот Фонд, тој е стабилен и пензиите редовно се исплаќаат секој први во месецот, соопшти министерката за труд и социјала Јована Тренчевска. Дупката во Фондот е драстично намалена, а бројките покажуваат дека неговиот дефицит се движи од 31 до 32 отсто, што е драстично помалку од ситуацијата во 2019 година, кога тој изнесуваше дури 47 отсто. Пензионерите не треба да се грижат, додаде Тренчевска и се пофали дека од 2022 година, кога беше донесена новата Методологија за пресметка на пензиите, тие до лани се зголемени за 30 отсто. Кога ќе излезат и пресметките за инфлацијата во првите три месеци, од март најстарите граѓани ќе добијат ново зголемување, дополни таа.

-Намалениот дефицит во Фондот е производ на зголемените приходи од придонесите од новите вработувања. И државата сега најредовно си ги плаќа сите ослободувања од придонесите, така што дефицитот постојано се намалува. Пензионерите може да бидат спокојни и да си го чекаат први во месецот, а во март ги чека ново зголемување – информираше Тренчевска.

Ако има потреба по изборите ќе се креира нов пакет мерки за помош на најранливите категории граѓани, а за некој ден ќе почне и исплатата на втората рата од помошта за најниските пензии.

Март ќе донесе и зголемена минимална плата и таа ќе се движи од 22.500 до 23.000 денари во прватниот сектор. Ова е основата за исплата на минималецот во приватниот сектор, а на тоа се пресметуваат минатиот труд и другите додатоци во зависност од дејноста, исткна Тренчевска.

-За две години, минималецот е зголемен за 7.000 денари, а од март веќе ќе нема плата пониска од 22.500 или 23.000 денари, во зависност од инфлацијата – истакна Тренчевска.

Директорката на Државниот инспекторат за труд, Весна Томовска, дополни дека работодавачите се многу повнимателни и речиси и да нема претставки за неисплатена минимална плата.

-Ако пред 6 години, текстилните работнички беа најоштетени со примања под минималецот, сега веќе ситуацијата сосема обратна. Тие се оснажија и не се плашат да пријават ако не им се исплаќа минималната плата, за што покрај нашите кампањи имаме најголема поддршка од невладините организации – рече Томовска.

Инаку, за првпат се воведува и јубилејната награда за долгогодишна и непрекината работа во една фирма и таа ќе се движи од 50 до 200 отсто од просечната бруто плата во државата. Се зголемуваат и додатоците се специјалните овластувања, како и платеното работно отсуство и тоа од 7 на 10 дена, вон годишниот одмор.