Пензионерите бараат усогласувањето на пензиите да биде на 1 јануари и на 1 јули секоја година

Основата за наредното предвидено усогласување на пензиите во септември, да биде пензијата што беше линеарно зголемена за 5.000 денари (септември 2024 и март 2025 година по 2.500 денари), децидна е Станка Трајкова, претседателка на Сојузот на здруженијата на пензионерите (СЗПМ)

Основата за наредното предвидено усогласување на пензиите во септември, да биде пензијата што беше линеарно зголемена за 5.000 денари (септември 2024 и март 2025 година по 2.500 денари), децидна е Станка Трајкова, претседателка на Сојузот на здруженијата на пензионерите (СЗПМ). Таа за „Слободен печат“ објаснува дека, според регулативата утврдена со Законот за пензиско и инвалидско осигурување, веќе е утврдено дека пензиите ќе се усогласуваат на 1 септември годинава.

Министерката за финансии Гордана Димитриеска Кочоска најави дека во септември, на само еден месец пред локалните избори закажани за октомври, ќе има ново зголемување на пензиите. Таа додаде дека сè уште не е одлучено дали тоа ќе биде линеарно, со фиксна сума за сите пензионери, или ќе биде изразено во процент од пензијата што ја прима секој од нив. Презентирајќи го предлогот за ребаланс на Буџетот, Кочоска рече дека вкупниот трансфер од државниот буџет до Фондот за пензиско и инвалидско осигурување оваа година ќе биде околу 50 милијарди денари (околу 800 милиони евра).

Лани во август, Димитриевска-Кочоска не даде прецизен одговор дали линеарното покачување на пензиите значи целосно напуштање на системското процентуално усогласување на пензиите двапати годишно.

– Одлуката за линеарно зголемување на пензиите од по 2.500 денари донесена од Владата се однесува за септември 2024 и март 2025 година – рече тогаш министерката, без да прецизира дали целосно го напуштаат системското усогласување на пензиите. За да обезбедат средства за исплата на покачувањето во иднина, според министерката на редовна основа ќе ја следат наплатата на придонесите и извршувањето на расходите од страна на Фондот за пензиско осигурување и ќе реагираат доколку има потреба.

Претседателката на СЗПМ, пак, е децидна дека нивното барање е зголемувањето на пензиите да се дава за 12 месеци и да не им се кратат 4 месеци, беше преточено во амандман на членот 37 од Законот за измени и дополнувања на Законот за ПИО, кој пратениците не го прифатија во март годинава.

– Повеќе од две години бараме правото на усогласување на пензиите да се врши од 1 јануари и од 1 јули секоја година, бидејќи така ќе се исправи една неправда кон пензионерите. Со измените на членот 37 од Законот за ПИО е утврдено дека усогласувањето ќе се врши на 1 март и на 1 септември, според податоците од Државниот завод за статистика. На тој начин се кратат 4 месеци (јануари и февруари, јули и август), што влијае врз материјалната сигурност на повозрасните граѓани. Ова право тие го користеа до 2019 година и неосновани се аргументите дека пензиите треба да се усогласуваат од 1 март и 1 септември заради добивање податоци од Републичкиот завод за статистика, затоа што усогласувањето може да се исплати како разлика и тоа право им следува на 340.000 пензионери – додава Трајкова.

Да се зголеми лимитот до кој пензионерите се ослободени од болничка партиципација

Зголемување на лимитот на пензијата од 18.000 на 25.000 денари, до кој износ пензионерите ќе бидат ослободени од болничка партиципација, бараат пензионерските здруженија.

– Барањето е многу значајно бидејќи со зголемувањето на пензијата за 5.000 денари, ниту еден корисник на пензија веќе не е опфатен во групата што користи болничка партиципација, бидејќи најниската пензија веќе е над 18.000 денари. Пензионерите со зголемување на пензиите за 5.000 денари не би требало да ги губат другите права што досега ги користеле – посочува Трајкова.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот