Тајните документи на Пентагон кои „протекоа“ на социјалните мрежи покажуваат песимистичко американско гледање на воената ситуација во Украина, укажуваат на украинските проблеми со вооружувањето и противвоздушната одбрана и предвидуваат дека во наредните месеци ќе има застој во војната, наведува Си-Ен-Ен.

Документите, кои се чини дека датираат од февруари и март, ги наведуваат воените недостатоци на Украина додека Киев се подготвува за пролетна контраофанзива.

Неколку доверливи документи предупредуваат дека украинската противвоздушна одбрана со среден дострел за заштита на војниците од фронтот ќе биде „целосно исцрпена до 23 мај“, што сугерира дека Русија наскоро би можела да има воздушна супериорност и дека Украина може да ја изгуби способноста да собере копнени сили во контраофанзива.

Документите, исто така, ги истакнуваат проблемите со руската воена офанзива, предвидувајќи дека резултатот ќе биде ќор-сокак меѓу двете страни во догледна иднина.

„Руската жестока кампања на трошење во регионот на Донбас најверојатно ќе влезе во ќорсокак, попречувајќи ја целта на Москва да го заземе целиот регион оваа година“, се вели во еден од доверливите документи.

Официјални лица запознаени со ситуацијата изјавија за Си-Ен-Ен дека се чини дека документите се дел од дневниот разузнавачки брифинг подготвен за високи лидери на Пентагон, вклучително и началникот на Здружениот Генералштаб, генерал Марк Мили.

Во документот, означен како „строго доверлив“, цитиран од „Вашингтон пост“, се наведува дека Киев се соочува со значителни „недостиг на генерирање сила и одржување“ и затоа најверојатно ќе оствари само „скромни територијални придобивки“, пренесува српска Политика.

Документот е снимка од ситуацијата од почетокот на февруари, а нејасно е колку Украина со поддршка на земјите-членки на НАТО успеала да ги надомести недостатоците оттогаш.

Во меѓувреме друг документ, од 23 февруари, што го видел британски „Гардијан“, го опишува напредокот на изградбата на 12 борбено веродостојни нови бригади за да ја предводат контраофанзивата, опремени со 253 тенкови и околу 1.500 други оклопни возила од различни типови.

– Три бригади требаше да формираат самите Украинци, додека останатите девет требаше да се формираат со помош на САД, сојузниците и партнерите. Планираните бригади беа далеку од подготвени во моментот на изготвување на документите, а пет допрва требаше да започнат со обука. Шест бригади имаа половина или помалку од потребната опрема – наведува британскиот медиум.