Претседателот Стево Пендаровски денеска се сретна со премиерот на Кралството Белгија Александер Де Кро, на која биле констатирани пријателството и партнерството меѓу двете држави. Како што информира Кабинетот на Претседателот, во фокусот на разговорите биле билатералните односи, македонската евроинтеграција, економската соработка, како и политичките и економски текови во Европа.

-Претседателот Пендаровски го поздрави позитивниот тренд на зајакнување на политичкиот дијалог меѓу двете земји и оцени дека честите размени на посети на високо ниво дополнително ќе ја продлабочат политичката доверба, а ќе го поттикнат и економскиот развој. Соговорниците изразија задоволство од унапредувањето на економската соработка меѓу двете земји и зголемувањето на белгиските инвестиции во Северна Македонија, информираат од Кабинетот.

Пендаровски изразил благодарност до белгискиот премиер за доследната и постојана поддршка на македонските европски интеграции и политиката на проширување на ЕУ. На средбата биле разменети мислења и ставови за претстојното белгиското претседавање со Европската Унија во првата половина на 2024 година и за стабилноста и безбедноста на европскиот континент, при што била посочена важноста на партнерството во НАТО во справувањето со геополитичките предизвици наметнати од војната во Украина.