Кина денеска го поздрави примирјето што стапи во сила во Појасот Газа и најави испраќање на хуманитарна помош за Палестинците.

– Кина го поздравува примирјето и се надева дека и двете страни сериозно ќе го почитуваат прекинот на огнот и запирањето на насилството”, изјави портпаролот на кинеското Министерство за надворешни работи Жао Лиџијан.

Тој додаде дека сега е на меѓународната заедница да работи на мировни разговори со цел да се постигне „фер, трајно и сеопфатно решение за двете земји”.

Кина вети дека на Палестинците ќе им испрати итна помош од милион долари, како и донација во иста количина за агенцијата за помош на бегалците на ОН и ќе достави 200.000 дози вакцини против коронавирус.

– Кина го цени посредувањето на Египет, ОН и другите страни, рече портпаролот.

Примирјето во појасот Газа официјално стапи во сила денеска во два часот по локално време (еден часот по средноевропско време).