Фудбалерот на Челзи, Педро, соопшти дека во летниот период ќе го напушти „Стефорд Бриџ“. На крилниот играч од Шпанија му истекува договорот со „Сините“, и судејќи според изјавата, до продолжение на соработката нема да дојде.

– Да, кога ќе ми истече договорот, си одам од Челзи – рече 32-годишниот фудбалер во интервјуто за „Кадена Сер“.

На прашањето дали знае каде ќе ја продолжи соработката, екс членот на Барселона вели:

– Сега тоа не е важно. Што и да се случи, ќе се случи, но сега не знаеме ни кога ќе се вратиме на тренинг поради целокупната ситуација (поради епидемијата на коронавирусот).

Педро во Челзи дојде во 2015 година од Барселона за 21 милион фунти. Во меѓувреме одигра 201 меч, постигна 43 голови и запиша 28 асистенции.

Со лондонската екипа успеа да ги освои Премиер лигата, ФА купот и Лига Европа.