Коронавирусот ги натера партиите да мируваат. Со замрзнати партиски активности на терен, чекаат натамошни насоки. По ДУИ, и СДСМ и ВМРО-ДПМНЕ се со став дека ќе ги слушаат препораките на Кризниот штаб за средбите со граѓаните. За сега сите потврдуваат дека нема да одат од врата до врата, ниту пак ќе имаат партиски средби, митинзи и големи јавни граѓански собири. Од партиите порачуваат дека ќе ги слушаат неодамна дадените препораки на Кризниот штаб за епидемиолошката состојба со корона вирусот, организаторите да ги откажат сите поголеми јавни настапи до 6 март.

Од СДСМ велат дека партијата ќе постапува согласно препораките на Кризниот штаб и на Министерство за здравство.

– Препораките мора да ги почитуваме независно од тоа дали сме политичка партија или невладина организација. Најмалку партиите треба да креваат паника без разлика дали се власт или опозиција. Не би смеел никој да си дозволи да политизира едно такво прашање кое може да крене паника меѓу граѓаните и кое може да предизвика последици – вели портпаролот на СДСМ Костадин Костадинов.

И во ВМРО-ДПМНЕ велат дека ја следат ситуацијата со коронавирусот и дека засега немаат теренски активности.

– Експерти членови на партиската Комисијата за здравство будно ја следат состојбата и ќе ги дадат сите следни насоки во врска со јавните собири. Во моментов немаме најави за собири од јавен карактер – вели портпаролот на ВМРО-ДПМНЕ Димче Арсовски.

ДУИ веќе донесе одлука. Додека траеле препораките на СЗО и домашните институции нема да организира јавни собири.

– Како политички партии независно од нашата потреба да бидеме со граѓаните за да ги претставиме нашите постигнувања или ветувања, имаме одговорност кон здравјето на граѓаните. Сметаме дека било какви активности кои можат да ја зголемат шансата на ширење на болеста треба да бидат сведени на минимум. Ги повикуваме и другите партии да го сторат истото – рече портпаролот на ДУИ Бујар Османи.

Пред неколку дена, на седница, Владата го прифати предлогот на Кризниот штаб да се откажат карневалите во Струмица и во Прилеп. Владата исто така, препорача спортските настани до 6 март да се играат без публика. Овие препораки се однесуваат и на поголеми забавни и културно-уметнички манифестации. Владата на организаторите на други јавни настани им препорача одлуките да ги носат врз основа на консултации и мислења на Комисијата за заразни болести.

Претседателот на Државната изборна комисија Оливер Дерковски, очекува партиите да се придржуваат до препораките во врска со јавните собири во контекст на превентивата од корнонавирусот. Тој, согласно ситуацијата, се надева дека сите ќе бидат внимателни и одговорни во превземањето на постапките.