Возачите на мотоцикли и скутери во Париз се нервозни откако властите им наредија да плаќаат паркинг. Властите во француската престолнина ќе постават паркинг места и за возачите на овие возила од четврток, 1 септември.

Од градот велат дека промената е неопходна за да се одговори на „климатските и јавно здравствените проблеми“. Тие ќе наплаќаат 3 евра од час за мотоциклите во центарот на Париз и 2 евра во надворешните области. Жителите можат да платат 22,50 евра за годишна картичка што им дава право на тарифа од 0,75 евра дневно, пренесува Еуроњуз.

„Тоа е катастрофа. Работиме од 8 до 12 часа, со 3 евра од час за паркинг, тоа ќе не чини во просек 500 евра месечно“, рече Себастиен Мазелие, кој е вработен во безбедносниот сектор и патува низ Париз со својот мопед за работните состаноци.

Продавниците за мотоцикли велат дека воведувањето на трошоците за паркирање ги натера потрошувачите да се префрлат на електрични мотори и скутери, кои се ослободени од плаќање.

Јони Лугаси, менаџер на продавница за мотори во Париз, вели дека продажбата на моторни возила на две тркала е намалена за 20% од почетокот на годината. Според него, зголеменото работење од дома, поради пандемијата, ја намалил употребата на мотори и дека трошоците за паркирање само ќе придонесат за тој тренд.

„Луѓето купуваат електрични мотоцикли не за да загадуваат помалку, туку само за да избегнат да платат за паркирање“, рече тој. „Минатата недела продадовме околу шеесет електрични возила на две тркала“.

Ромен Лагрост, кој живее на 45 километри од центарот на Париз, рече дека би сакал да си дозволи да купи електричен мотор, но не може да си го дозволи.

„Го купив мојот нов мотоцикл за 8.000 евра, а нов електричен е 20.000 евра. Тоа е кражба!“, се пожали Ромен.

Дејвид Белијард, помошник градоначалник на Париз, рече дека мерката се однесува на охрабрување на патниците да користат други форми на транспорт.

„Тоа е контроверзна мерка, многу луѓе не се задоволни“, рече тој. „Но, има и многу луѓе кои ја чекаат оваа мерка“.

„Огромното мнозинство луѓе кои денес доаѓаат на работа тоа го прават со јавен превоз. Се проценува дека низ Париз минуваат 100.000 скутери и мотоцикли.“