Од денес, на Парижаните им е дозволено да пливаат во реката Сена на три локации одобрени од градските власти до 31 август, под услов безбедносните услови да не бидат загрозени.

Речиси една година по Олимписките и Параолимписките игри во Париз во 2024 година, каде што спортистите пливаа во Сена, Парижаните ќе можат да пливаат и во реката, објавува порталот BFM TV.

До 700 лица ќе бидат дозволени во најголемиот од официјалните базени во Берси, 200 на локацијата Гренел и околу 150 на плажата Маре.

За да се обезбеди безбедноста на пливачите, властите бараат малолетниците под 14 години да бидат придружени од возрасно лице.

„На туристичките локации, длабочината на реката е од 40 до 60 сантиметри, а покрај пливањето, дозволени се и водни спортови“, објави градската влада на Париз.

Додека пливањето во градските реки во Франција е сè уште доста ограничено, тоа не е случај во неколку европски метрополи, како што се Копенхаген, Берн, Виена, Амстердам и други градови, според француската телевизија.

Многу европски градови им дозволуваат на своите жители да уживаат во слободно пливање во текот на летото, па дури и во зима за поавантуристички настроените.

Во Минхен, Германија, е можно да се плива во реката Изар, додека во соседна Австрија, до капењето на Дунав може да се стигне со метро од центарот на Виена.

Капачите можат да уживаат и во водите на Дунав подалеку низводно, во унгарската престолнина Будимпешта, каде што се развиени неколку плажи покрај реката, според BFM.