Франција, Велика Британија и Германија денес започнаа механизам што овозможува повторно воведување на санкциите на Обединетите нации врз Техеран поради неговото непочитување на своите обврски во врска со нуклеарната програма, според писмо до Советот за безбедност што го виде агенцијата Франс Прес.

Овие три земји, европски членки на Советот за безбедност, сакаат да го информираат тоа тело на ОН дека, врз основа на фактички докази, проценуваат дека Иран значително ги крши своите обврски според нуклеарниот договор од 2015 година.

Затоа тие се повикуваат на механизам познат како „snapback“, кој активира 30-дневен процес за повторно воведување на целиот опсег на санкции суспендирани пред една деценија, се вели во писмото.

Европејците се закануваат со ова со месеци, а активирањето на механизмот се случува неколку недели пред неговото истекување и во време кога дипломатијата е во застој, како и неколку недели по израелското и американското бомбардирање на инсталациите на иранската нуклеарна програма.

Преговорите меѓу САД и Иран се во застој, соработката на Техеран со Меѓународната агенција за атомска енергија (МААЕ) задолжена за надгледување на нејзината нуклеарна програма е ограничена, а разговорите меѓу Иран и Европејците не дадоа никакви резултати.

Тие три европски земји, таканаречената Е3, ќе го искористат целосно 30-дневниот период за да се обидат да најдат договорено решение и да успеат да избегнат повторно воведување санкции, додадоа во писмото тројцата министри за надворешни работи, Жан-Ноел Баро за Франција, Дејвид Лами за Велика Британија и Јохан Вадефул за Берлин.

Иран вети дека ќе одговори на „неоправданата и нелегална“ одлука на Европејците, објави Министерството за надворешни работи на Иран по телефонскиот разговор меѓу иранскиот министер за надворешни работи Абас Арагчи и неговите колеги од Франција, Германија и Велика Британија.

Советот за безбедност на ОН објави дека ќе одржи вонреден состанок зад затворени врати во петок за да започне механизам за повторно воведување санкции врз Иран поврзани со неговата нуклеарна програма, изјавија денес дипломатски извори за Франс Прес. Средбата ќе се одржи во 10:00 часот (16:00 часот по средноевропско време) на барање на Франција и Велика Британија, соопштија изворите.