Иако е сезона на летни годишни одмори, во Битола деновиве најактуелна тема е „Зимската приказна“ што Општината Битола ја организираше во пресрет на дочекот на Новата 2023 година. Но, овојпат предмет на интересирање на битолската јавност не се настаните кои се одржаа за време на Зимската приказна, туку парите кои Општината Битола ги потрошила за нејзино организирање.

По барање на опозицијата, или новото мнозинство во Советот на Битола, деновиве од страна на Општината и беа презентирани податоците за издвојувањата на локалната самоуправа за т.н. Зимска приказна и културните настани кои се одржаа во Битола во периодот од 1.01.2023 до 22.08.2023 година.

Според Извештајот на локалната самоуправа Битола за културните настани и Зимската приказна од општинскиот буџет издвоила ни помалку, ни повеќе, туку вкупно 14.439.607,00 ден. или над 230.000 евра.

Во објаснувањето за вака потрошените пари, од страна на локалната самоуправа изјавија:

– Во последно време културата во нашиот град се сатанизира преку разни преписки, обвинувања, па и предупредувања дека „културата е една од најкриминогените области во кои Коњановски и ДПМНЕ вршат вистински грабеж на парите на битолчани.

Дел од написите во порталите и одредени партиски соопштенија, во себе содржеа и невистини, кои не само што удираат по угледот на општината, туку претставуваат директна навреда кон градоначалникот. Програмата за култура на Општина Битола за 2023 година, беше изгласана во Советот на Општина Битола во вредност од 14.800.000 денари.

Немајќи каде, притисната од новото мнозинство во Советот, локалната власт ги обелодени парите што ги потрошила за Зимската приказна и за други културни настани.

Податоците кои беа објавени во извештајот на Општината ги „смрзнаа“ битолчани.

Иронијата да биде поголема, иако не планирала да издвои средства за таа намена, сепак Општината Битола на фирмата „Камај Медија“, која е блиска до локалната власт, за осветлување и озвучување на настани што ги организира градот му исплатила вкупно 1,2 милиони денари или околу 20 илјади евра само за осветлување и озвучување.

Во извештајот, бодат очи и исплатените средства на фирмата“ Футура ТИМ“ ДООЕЛ, за „архивирање“ на Зимската приказна за 2023 година, на која и се исплатени вкупно 750 илјади денари.

Интересно е што оваа фирма по исплатата на парите е ликвидирана.

Значајни средства за „Зимската приказна“ се исплатени и на други правни лица и Здруженија на граѓани, како што се“ Мјузик АРТ“ Битола, во чии состав работи Камерниот оркестар, на кој му се исплатени големи суми на пари, театарот „Бабец“ кои се блиски до локалната власт, како и на голем број физички лица кои се партиски експонирани како членови на ВМРО-ДПМНЕ.

– Додека во Битола владее хаос и кога фекалии течат по улиците, кога имаме неисчистени паркови, стари контејнери, актуелната локална власт се занимава само со „култура“. Инсистирам некој од Општината да ни објасни мене и на битолската јавност за какво „архивирање“ на Зимската приказна станува збор и како се исплатени тие 750 илјади денари? За мене лично спорни се и трите ставки за 3 Д мапинг проекцијата на Офицерскиот дом. Во две ставки на физички лица им се исплатени по 94 илјади денари, а во една ставка каде што стои 3Д мапинг за настани за Зимската приказна, 258 илјади денари му се исплатени на некое Здружение на Македонците по потекло од Албанија „Сонце“. Каква е поврзаноста на ова Здружение со 3Д мапирање на настани на Зимската приказна?-ја праша локалната власт советникот на независната листа „Поинаку“, Иван Чулакоски кој притоа додаде дека со парите кои локалната власт ги исплатила за озвучување и осветлување досега ќе купеше и бина и сопствено осветлување и озвучување, а не секоја година да му се даваат тендери на луѓе блиски до власта и да им се кешираат огромни суми на општински пари.

Од партијата Левица велат дека со објавувањето на извештајот се потврдија сомневањата дека некои правни субјекти и физички лица кога станува збор за распределбата на парите за ” Зимската приказна“ се привилегирани.

– Како е можно на фирма, регистрирана за маркетинг, која вршела архивирање на настаните од „Зимската приказна“ да ѝ се исплатат 750.000 денари, за истата веднаш потоа да биде ликвидирана-прашуваат од партијата Левица.

Од Битолската локална самоуправа велат дека тенденциозни и лажни се обвинувањата за реализацијата на буџетот за програмата за култура на Општина Битола за 2023 година, која беше изгласана во Советот на Општина Битола во вредност од 14.800.000 денари.

– Во усвоениот буџет за култура, не беа предвидени средства за Зимската приказна, која за волја на вистината, донесе многу радост кај публиката од сите генерации.

Во буџетот за култура не влегуваа ставките за озвучување, осветлување, огномет итн., без кои културните настани не би биле комплетни. Одолговлекувањето на ребалансот предизвика застој, по што запреа сите културни манифестации во градот и не им се даде можност на локалните изведувачи да ја покажат својата креативност во текот на летните месеци и да презентираат култура и уметност. Затоа пак, во недостиг на настани со вистинска културна вредност, на граѓаните, туристите и бројните гости од целиот свет, кои престојуваа ова лето во Битола, им се сервираше турбо фолк, или содржини без културно значење-стои во соопштението на Општина Битола.

Интересно е тоа што овие фирми кои и од оваа локална самоуправа се добро „кеширани“ добиваа исто така големи средства и кога градоначалник на Битола беше ексградоначалникот Владимир Талески од ВМРО-ДПМНЕ кој ја остави Општина Битола заглавена во долг од 13 милиони евра.

Но, во Битола деновиве велат дека Талески, кој на градоначалничката функција дојде од областа на културата, помалку средства трошел во однос на сегашната локална власт.