Уште од  1999 година, илјадници српски граѓани на Косово продолжуваат да работат во паралелни институции, oпштини, компании , јавни претпријатија, детски градинки, основни и средни училишта, како и јавни универзитети финансирани и управувани од државата Србија, пишува Радио Слободна Европа. 

Овие механизми, иако незаконски според законите на Косово, не престанаа да функционираат и покрај тоа што Косово прогласи независност во 2008 година.

Во рамките на дијалогот Косово-Србија за нормализација на односите, договорот за нивно елиминирање беше постигнат во април 2013 година, но неговото целосно спроведување на терен остана нереализирано.

Во рамките на дијалогот Косово и Србија се договорија и за формирање на Заедница на српски општини каде има мнозинско српско население, која би имала „целосна јурисдикција“ во одредени области, како што се: просторното планирање, здравство, образование, економскиот развој и сл.

Но, Владата на Косово никогаш не го спроведе овој договор, со образложение дека може да ја загрози функционалноста на државата.

Премиерот на Косово, Албин Курти и претседателот на Србија, Александар Вучиќ, на средба во Охрид, на 18 март, се договорија за спроведување на новиот договор кон нормализација, поддржан од Европската унија.

Овој договор, меѓу другото, предвидува дека српската заедница во Косово ќе добие „соодветно ниво на самоуправување“.

Во извештајот пред Собранието на Косово, на 23 март, Курти рече дека „самоуправувањето не е ниту самовладеење ниту пак е сопствена администрација“ и додаде дека не може да се избегнат поранешните договори со Србија.

Специјалниот пратеник на ЕУ за дијалогот Косово-Србија, Мирослав Лајчак, во интервју за Радио Слободна Европа изјави дека Косово има обврска веднаш да започне со спроведување на делот од договорот за нормализација, кој е поврзан со формирање на Заедницата на српско општини на Косово.