Поранешниот претседател на Кривичниот суд, Владимир Панчевски, денеска самиот се пријавил во истражниот затвор “Скопје” за да ја одлежи затворската казна од две и пол години, на која беше осуден за случајот “Акмис”.

Директорот на истражниот затвор “Скопје”, Филип Андов, за Фокус, изјави дека Панчевски е сместен во приемното одделение.

Панчевски првично беше осуден на казна затвор од три и пол години, но Апелација му ја намали за една година. Беше прогласен за виновен за злоупотреба на службената положба кога го заобиколувал компјутерскиот систем и рачно местел предмети кај одредени судии, во периодот од 2013 до 2016 година.

Тој беше разрешен од судиската функција поради нестручно и несовесно работење во декември 2019 година, а Врховниот суд неговото разрешување го потврди во јуни 2020 година.