Израел ги отфрли обвинувањата за нападот на болницата во Газа и објави дека за експлозијата е одговорна групата „Исламски џихад“. Презентираа сателитски снимки и прислушувани разговори кои, велат, докажуваат дека не биле инволвирани. Овој напад дополнително ги затегна не само израелско-палестинските односи, туку и односите во регионот.

Палестинскиот новинар Имад Афанен за српската телвизија N1, зборувајќи за вчерашното бомбардирање на болница во Газа, изјави дека Израел пред бомбардирањето испратил предупредување до болницата дека ќе биде бомбардирана, и дека сите ранети и болни треба да ја напуштат.

„Американскиот Волстрит журнал потврди дека типот на бомба е МК 84“, посочува Афанен.

Новинарот нагласува дека речиси сите болници во Појасот Газа добиле предупредување од израелската армија да ги ослободи.

„Луѓето се засолниле во болниците мислејќи дека никој нема да ги бомбардира болниците“, објаснува Афанен.

Соговорникот забележува дека еден ден пред да биде бомбардирана болницата, израелските воени сили фрлиле бомба во близина на болницата.

„Администрацијата на таа болница ја води црквата од Ерусалим“, вели тој.

Бројот на жртвите се зголемува секој час, а прашањето за мир, смета тој, зависи од Израел.

Потсетуваме дека палестинските власти во Рамалах и Хамас во Газа го обвинуваат Израел за нападот во кој тврдат дека загинале повеќе од 500 луѓе. Тие го нарекуваат овој напад геноцид врз палестинскиот народ. Рускиот претседател Владимир Путин, кој е во посета на Кина, не утврди кој е одговорен за нападот, но вели дека експлозијата во болницата е јасен сигнал дека е неопходен прекин на огнот. Во Израел пристигна и американскиот претседател Џозеф Бајден.