Првообвинетиот за убиствата на малолетната Вања и велешанецот Панче Жежовски, Љупчо Палевски Палчо должел 15 илјади евра, сведочи Ламбе Бучков кој комуницирал со Палчо.

Се знаеле од 2011, 2012 кога Палевски знаел дека сведокот имал имотен пријател и побарал од него да ја доврши зградата Тифани, во центарот на Скопје, бидејќи Палевски немал пари.

Кираца Трајковска била „мозокот“ – таа интуитивно ги поврзала исчезнувањата на Вања и Панче

Потоа продолжиле да комуницираат откако Палчо ги понудил локациите што ги имал земено од општина Центар за другарот да гради.

-Беше направен договор, на нотар му беше даден аванс од 15 илјади евра – рече сведокот.

Но, не добиле дозвола за градба,  а парите никогаш не ги вратил. Бидејќи парите биле преку него земени, Бучков зел кредит да му ги врати пари на пријателот.

Освен за авансот што му бил даден од пријателот, Бучков кажа дека Палевски му должи 16 илјади евра за рекламите, билбордите што биле на зградата Тифани.

Петнаесетте илјади евра Бучков не му ги ни барал, ги барал од заеднички пријател кој при предавањето на парите на Палчо си зел 3000 евра за себе.

Шеснаесетте илјади евра му ги барал и последно Палчо му ветил дека ќе му ги даде до крајот на 2023 година.

Од септември 2022 година секојдневно му ги барал парите, а Палчо велел дека чека некои пари да му ги вратат.

-Имаше многу пари, но почна колата да оди надолу. Почнаа да му рушат, мислам политичката елита – рече Бучков.

Се слушнале и кога бил во Белград и кога бил во Турција и Палевски тврдел дека ќе се врати да расчисти за тоа што го обвинуваат.

Тој тврдел дека оди на состаноци за партијата и во Турција и во Софија.

Бучков се видел со брат му на Палевски летоска и тој му рекол на сведокот „Го знаеш брат ми, нема шанси да стори такво нешто, ќе те викнат за сведок, кажи ја вистината“.

-Знам дека Љупчо имал пиштол, сам ми кажувал дека имал неколку вида на оружје – рече Бучков.

Кога дознал за настанот сведокот се јавил кај висок полициски функционер и му рекол дека е во контакт со Палевски и дека ако треба ќе го донесе.

-Шест месеци мене некој ме следи и ме прати и по базни станици и кај одам што одам – рече Бучков.