67-годишен човек од дебарското село Скудриње загинал откако паднал од дрво додека собирал костени, а неговата сопруга од Албанија потоа била уапсена кога се обидела да ја напушти државата, соопшти МВР.

„Вчера во 14.00 часот во СВР Тетово, од болницата во Дебар било пријавено дека кај нив бил донесен починат Ј.А.(67) од с.Скудриње, општина Маврово и Ростуше. Според пријавеното, тој паднал од дрво и починал додека со неговата невенчана сопруга Џ.Б.(53) од Република Албанија собирале костени. Откако бил однесен во болницата, Џ.Б. ја напуштила болницата и во 17.10 часот била лишена од слобода на граничниот премин Џепиште во обид да ја напушти државата“, информираат од МВР.

Од полицијата велат дека жената „била задржана во Полициската станица Гостивар за понатамошна постапка“, без да посочат дали таа се доведува во врска со смртта на нејзиниот сопруг, односно дали постојат сомневања околу нејзината верзија за начинот на кој се случила несреќата.