Социјалната мрежа Твитер денеска е недостапна за корисниците во Турција, што предизвика шпекулации дека во тоа се вмешани властите, заинтересирани да не се слушаат сѐ побројните критики за одговорот на катастрофалниот земјотрес, кој однесе повеќе од 9.000 животи во земјата.

Во прилог на ова зборува и фактот што Твитер е достапен за корисниците кои имаат пристап до ВПН-услуги за затскривање на локацијата на корисникот.

Сајтот што ги следи социјалните мрежи netblocks.org објави дека пристапот на Твитер прво бил отежнат, а потоа и целосно блокиран на мрежите на сите поголеми телекомуникациски компании.

„Турција има богата историја на ограничување на социјалните мрежи за време на вонредни и безбедносни инциденти“, се вели на страницата.

Турската полиција уапси 18 лица по земјотресот во понеделникот поради „провокативни“ објави на социјалните мрежи во кои се критикува начинот на кој владата на претседателот Реџеп Таип Ердоган се справува со катастрофата.

Турските власти постојано предупредуваа на ширење на дезинформации пред изборите на 14 мај на кои Ердоган ќе се обиде да го продолжи своето 20-годишно владеење.