Во колку лоша состојба се наоѓаат некои дрвја во Скопје пример е дрвото кое денеска падна во Жена-парк. Неговото стебло било толку исушено што буквално, под тежината на гранките, се скршило на половина. Со оглед на тоа колку минувачи има низ овој парк, среќа е што никој не е повреден.

Во Скопје честопати се случува да падне дрво при невреме, некој посилен ветар или затоа што стеблото му е исушено или изгниено. Од ЈП „Паркови и зеленило“ неколкупати сме побарале одговор дали редовно се контролира состојбата на дрвјата во градот, особено на постарите. Одговорот речиси редовно е потврден.

Од друга страна, вообичаена пракса е сечењето на дрвја низ Скопје да се спроведува по пријава на граѓани откако претходно ќе се утврди состојбата, но скопјани можат да забележат дека голем број дрвја обележени за сечење, со месеци стојат неисечени.

Затоа, внимателно движете се под дрвјата, особено оние кои се повеќегодишни.