Озонската дупка над јужната хемисфера оваа година е поголема од вообичаеното и веќе ја надмина големината на Антарктикот, соопшти денеска Службата за атмосферски надзор на Европската унија, Коперник, пренесува Гардијан.

Од Службата наведуваат дека озонската дупка, која се појавува секоја година во текот на пролетта на јужната хемисфера, значително е зголемена во последните недели.

„Се соочуваме со прилично голема и потенцијално длабока озонска дупка”, рече шефот на Коперник, Венсан Анри Пеш.

Атмосферскиот озон ја апсорбира ултравиолетовата светлина што доаѓа од сонцето.

Неговото отсуство значи дека повеќе од ова високо енергетско зрачење стигнува до Земјата, каде што може да им наштети на живите клетки.