Есента е во знакот на грозјето, костените, зелката, оревите и разни други овошја и зеленчуци кои, освен што се богати со вкусови, содржат и изобилство од драгоцени хранливи материи што ќе го штитат нашиот организам од болести во текот на постудените денови. Меѓу есенската суперхрана се наоѓа и омилената пченка, пишува „Живим“.

Тестовите со варена или печена пченка се прв знак на есента. Со оглед на благиот, сладок вкус, не е чудно што е омилена намирница, но би требало да биде и поради нејзините нутритивни вредности. Имено, пченката е уште една од намирниците богати со растителни влакна кои го намалуваат покачениот холестерол и ја регулираат дигестијата, а содржи и висок удел на фолна киселина, витамин Б1, кој е важен за правилна работа на мозокот, како и јаглехидрати кои нè снабдуваат со потребната енергија.

Пченката не содржи многу калории, еден кочан има околу 100, па без грижа можат да ја консумираат и оние кои внимаваат на линијата. Бројни истражувања покажаа дека пченката е важен заштитник на срцето поради изобилството на витамин Б5, фолна киселина, бета каротен, витамин Ц, фосфор, калиум и магнезиум, како и антиоксидантите лутеин и зеаксантин. Исто така, истражувањата покажаа дека пченката помага во развојот на добри бактерии во дебелото црево и дека помага при стомачни проблеми бидејќи ги ублажува симптомите на гастритис и чир на желудникот.

Два најчести типа на пченка се шеќерецот, кој најчесто се користи за готвење или се јаде сам, и полската пченка, која обично се меле и се користи како брашно. Ако купувате свежа пченка, внимавајте зрната да не се исушени и листовите да бидат што поздрави, а кога ја чувате во фрижидер, не ја држете блиску до намирници со интензивен мирис бидејќи пченката лесно ги апсорбира мирисите. Секогаш е најдобро да се јаде свежа пченка, но и замрзнатата е добар избор, додека онаа од конзерва користете ја само ако навистина немате ништо друго при рака.

Свежата пченка обично се вари или се пече на скара и како таква е одлично и здраво јадење, со малку сол. Но, варијантата во која се прелива со путер подобро е да се избегнува за да не ги намалите сите нејзини здравствени придобивки. Зрната од пченка можете да ги додавате во чорби, супи, јадења од зеленчук и салати, а од пченкарно брашно, освен палента, можете да подготвувате и палачинки, колачиња и други десерти или пак тортиљи. Исушените зрна можете да ги користите за подготовка на пуканки, кои се вкусен и здрав оброк, но повторно без преливи од путер, чоколадо и слично.