Ова е масовно убиство за пари, рече премиерот Христијан Мицкоски и ѝ порача на ДУИ да не игра на етничка и на политичка карта, зашто за уши од дома ќе ги вадат и ќе одговараат. Тој информира дека за минатата година биле издадени само 12 лиценци за кабареа и порача дека сите што немаат дозволи, ќе бидат затворени. Арбр Адеми од ДУИ, во одбрана на ексминистерот за економија Крешник Бектеши, најави кривична пријава до Обвинителството и дека ќе ја обелоденат целокупната документација.

– Шокантна е состојбата со издадените лиценци. Дојдовме до заклучок дека во 2024 година се издадени 12 лиценци за кабареа, а вие може да претпоставите колку клубови работат во државата, само 12 се со лиценци и тоа не знаеме кои од нив се сѐ уште валидни бидејќи на некои рокот им е изминат зашто се со важност од една година – рече Мицкоски.

Тој повтори дека Владата ја очекува многу работа зашто тој што требало не си ја завршил работата и дека сега се обидува под наводно некаква политизација да ја скрие криминалната работа што ја правел во изминативе години додека раководел со таа институција, алудирајќи на Бектеши.

– Нема да има милост, кој сака нека биде, од каква сака етничка припадност и политичка партија. Тоа што се случувало е повеќе од криминал, ова е масовно убиство што некој го дозволувал за пари, мито и за корупција да се случи – рече Мицкоски.

За дискотеката во Кочани премиерот кажа дека само двапати ѝ била дадена лиценца и тоа во 2021 и во 2023 година, односно дека цело време работела без лиценца и прашање е тие што потпишале врз основа на кој елаборат го сториле тоа.

– Во 2024 година видовме како му потпишале бидејќи на тоа архивско бројче на кое се води фалсификуваната лиценца е коресподенција со странски инвеститор. Да им одговорам на тие што прават полноќни прес-конференции – тука нема политика, ќе одговарате сите што сте се дрзнале на овој начин да водите политика на грбот на граѓаните и на животите што овие деца ги изгубија. И нема да има милост, од дома ќе ги вадиме, ако мислат дека ќе се обидат на етничка карта да играат и на политиканство како што беше вчерашната полноќна прес-конференција, од дома за уши ќе ги вадиме – порача премиерот.

Тој додаде дека ќе ги затворат сите ноќни клубови што немаат лиценци и порача дека ќе ја добијат и битката со административната мафија како што ја победиле политичката мафија, а од коцкарската и енергетската мафија дел избегале, а дел притвориле.
Мицкоски констатира дека е доблесна оставката на градоначалникот на Кочани, Љупчо Папазов, бидејќи тој немал никаква вина и не одговори дали ќе следуваат и други оставки на функционери од ВМРО-ДПМНЕ.

– Јас и вчера кажав, еве јас ја прифаќам целата одговорност ако јас сум проблемот во државата, ако е тоа желбата на поединци. Но, нема да го имаат тоа задоволство сега додека не ги поразиме, а потоа ќе одиме на избори, па граѓаните ќе кажат кој треба да сноси одговорност, а кој треба да заврши во затвор. А градоначалникот без никаква одговорност е доблесен и поднесе оставка зашто ништо не зависи од него. Еве јас сум виновен, на мене префрлете ја вината – рече премиерот.

Адеми: Папазов морал да знае дека дискотеката нема лиценца

Потпретседателот на ДУИ Арбр Адеми најави дека деновиве ќе излезат со целосна документација и докази за тоа кој, како и на кој начин дозволил да се случи грозоморната трагедија во Кочани. Тој рече и дека ќе поднесат и пријава до Јавното обвинителство за поведување постапка за кривична одговорност за надлежните лица и институции, бидејќи, како што рече, одговорност мора да има и оваа трагедија не смее да се дозволи да се повтори повеќе никогаш.

-Катастрофалната трагедија во Кочани, во која загинаа голем број наши сограѓани, покрена многу прашања за безбедноста, контролата и функционирањето на институциите, особено за оние кои согласно закон знаеле и биле должни да знаат што се случува. Ова е трагедија од невидени размери, каде животот го загубија голем број млади луѓе. Одговорност мора да има, а во случајов ноторен факт е дека во март 2024 година министерот за економија Крешник Бектеши не дозволил да се издаде лиценца за тој објект, бидејки објектот не исполнувал услови, лиценца нема во регистарот на Министерството, ниту администрацијата изготвила таква лиценца во 2024 година. А, зошто објектот до март 2025 година работел без лиценца, одговорот треба да се побара на местото каде мора да се бара и добие одговорност за оваа трагедија – рече Адеми.

Тој го обвини градоначалникот Папазов дека знаел и бил должен да знае дека фирмата „ММММ кафе“ ДООЕЛ Кочани нема лиценца и не исполнува услови да ја врши таа дејност во неговото населено место. Според Адеми, тврдењата дека некој од Министерството за економија издал лажна лиценца се целосна конструкција. Тој додаде дека „во обид да ги спасат своите кадри од одговорност која мора да ја има, а првенствено градоначалникот на Кочани и надлежните во Министерството за внатрешни работи Кочани, кои секојдневно биле во објектот каде што се случи трагичниот настан, Владата на ВМРО-ДПМНЕ со конструкции се обидува гневот да го насочи кон барање одговорност каде што ја нема“.

Филипче: Трагедиите или ќе ја уништат или ќе ја зајакнат нацијата, од нас зависи

Претседателот на СДСМ Венко Филипче порача дека мора да има објективна и транспарентна истрага без дамка сомнеж за да се врати довербата во институциите.

-Ние сме денеска рането општество, довербата во институциите е срозена и ако сакаме таа доверба да ја вратиме мора да има целосно транспарентна, објективна истрага, никој не смее да биде поштеден ниту поранешни, ниту актуелни функционери. Тоа не е прашање на политика тоа е прашање на вистина и на правда. Трагедијата е преголема за сенка на сомнеж. Не смее да има индиции дека некој ќе биде заштитен, зашто тоа ќе биде удар за целото општество. Апелирам до обвинителството редовно да информира што точно се презема за да се спречат шпекулации – рече Филипче.

Филипче повика на единство без политички пресметки и нагласи дека неговата партија ќе ги поддржи сите иницијативи што ќе придонесат за расветлување на случајот.

-Трагедиите можат да уништат една нација или да ја зајакнат. Од нас зависи како ќе излеземе од ова – како држава што донела правда или како општество што дозволило ова да се заборави – рече Филипче.