Професор доктор Ана Миновска, која долги години беше редовен професор на Факултетот за медицински науки при Универзитетот „Гоце Делчев“ од Штип и е основач на Македонското стоматолошко друштво, со отворено писмо се произнесе за последните настани кои што се случија во Стоматолошката комора, откако министерот за здравство Азир Алиу ѝ ги одзеде ингеренциите на комората да лиценцира стоматолози и да одржува континуирана едукација.

Миновска е меѓународен предавач за пародонтологија и ласерска стоматологија, членка на Советот на Балканската стоматолошка асоцијација, активен член на Светската федерација за ласерска стоматологија и организатор и предавач на голем број врвни едукативни настани од областа на стоматологијата. Писмото го пренесуваме во целост:

Жалосно е што денес сведочиме на разочарувачки случувања во здравствениот систем, поврзани со Стоматолошката комора на Македонија (СКМ) а во однос на одлуките и коментарите на Министерото за здравство, кои наместо да носат стабилност и доверба, создаваат уште поголема неизвесност.

Сето она што го читам по порталите ме поттикнува да ги потсетам сите дека стоматолозите одамна покажале иницијатива, доблест и чувство за заедништво и знаење. Уште во далечната 1947 година, тие се организираат како секција при Македонското лекарско друштво (МЛД). Со текот на годините, преку процес на зреење, тие се осамостојуваат и во 2004 година се формира Македонското стоматолошко друштво (МСД), кое продолжува да ги промовира професионалните вредности и солидарноста меѓу стоматолозите.

Таа нивна истрајност и умешност во заедничко делување е потсетник дека секое успешно управување, без разлика дали во професија или во држава, зависи од тоа во чии раце се наоѓа кормилото. А токму кормилото на управувањето во секое општество, претставува невидлива, но силна точка на рамнотежа – место каде што се среќаваат мудроста и незнаењето, а власта, сама по себе, е како огледало — во неа се гледа вистинското лице на оној што ја држи.

Кога таа ќе падне во раце на зрел ум, кој ја разбира тежината на одговорноста, станува сила за создавање. Но кога ќе ја зграпчи некој без знаење, без искуство, таа станува чекан што удира и по темелите, и по кровот.

Она што генерации го создале не е само материја — тоа е врежана мудрост, искуство наталожено преку безброј обиди, грешки и успеси. Да се руши тоа, е како да се уништи библиотека за да се напише една нова книга од нула. Таа нова книга, ако е напишана од рака што не знае да чита, нема да биде дело на напредок, туку сведоштво за незнаењето.

Незнаењето има своја особена ароганција — верува дека почетокот секогаш мора да биде од него. Неискуството, пак, често е нетрпеливо — сака плод пред да го засади семето. И кога тие две ќе се здружат во амбицијата за власт, настапува опасна мешавина: рушење без план, менување без разбирање, владеење без служба.

Знаењето не се плаши од она што е создадено пред него — го почитува и го надградува. Зрелото искуство ја гледа вредноста и во старото и во новото, знаејќи дека вистинската сила на една заедница е во континуитетот, а не во прекинот.

Оној што бара власт без да научи од историјата, без да ги разбере причините зошто нешто опстојало и предходно, не е водач, туку патник што случајно се нашол на кормилото. А патот на таквиот брод е непредвидлив — често завршува во бури, и со уништени мостови зад него.

Затоа, прашањето не е само кој сака власт, туку кој е подготвен да ја носи со знаење, почит и смиреност. Зашто власта е најтешка токму тогаш кога ја користиш за да чуваш нешто поголемо од себе.

Силата на нашата професија не е во титулите и функциите, туку во заедништвото, знаењето и мудроста со кој се решаваат предизвиците.
Се надевам дека овој текст ќе допре до сите засегнати страни во нашиот здравствен систем, во интерес на заедничкото добро на стоматолошката фела. Ние заслужуваме повеќе од она што ни се случува – заслужуваме фер однос, почит и вистинско разбирање.

– Од Оснивачот и првиот претседател на МСД-Македонско стоматолошко друштво
Проф. д-р. Ана Миновска