Учениците со образовни потешкотии во ООУ „Киро Глигоров“ денеска добија нова и комплетно опремена сензорна соба која е донација од Турската агенција за соработка и координација ТИКА. Станува збор за донација на сензорна туба со меурчиња која менува бои, сензорни влакна, сензорна светлечка маса, светлечки листови и бројки, базен со топчиња, лулашка, темен шатор, трамболина и други содржини.

Вклучувањето на овие ученици во редовната настава е дел од образовната стратегија и сензорната соба што од денес ќе им биде достапна на децата од ова училиште е само уште еден мал чекор кон исполнувањето на главната цел, а тоа е нивна целосна инклузија. Предноста на оваа соба е тоа што можат да ја користат деца кои немаат вербална комуникација, но исто така се користи и во ситуации за намалување на вознемиреност, развојни потешкотии и сл. Искрено се заблагодарувам за оваа донација која верувам дека ќе придонесе за полесно совладување на наставниот материјал, ќе донесе поголема мотивација децата да учат и да истражуваат, но и да го намалат стресот и да ја зголемат концентрацијата“, изјави градоначалникот Горан Герасимовски.

Сензорната соба е наменета за околу 20-тина ученици од основното училиште „Киро Глигоров” и истата ќе биде во функција додека се изведува воспитно-образовната настава. Во моментов во Општина Центар функционираат сензорните соби во ООУ Гоце Делчев, Ј.Х. Песталоци, 11 Октомври, Кочо Рацин, Кирил и Методиј, а од денеска и сензорната соба во ОУ Киро Глигоров.