Скопското обвинителство отвори истрага за убиството на Орхан Бајрам – Оки, еден од водачите на криминалната група „Дуќанџик“ кој беше убиен минатата година во Ханиоти во Грција.

Осомничено е едно лице за кривично дело Убиство од член 123 став 2 точка 3 во врска со став 1 и член 22, како и за Неовластено изработување, држење, посредување и тргување со оружје и експлозивни материи според член 396 став 3.

-Осомничениот 33-годишник, на 15 јули 2023 година, во Ханиоти, Република Грција, заедно со уште едно засега непознато лице, со умисла го лишиле од живот сега покојниот Орхан Бајрами, а ги довеле во опасност и животите на уште четири лица. По претходен договор, осомничениот и неговиот соизвршител маскирани пристигнале во туристичкиот комплекс каде била сместена жртвата и се приближиле до отворената задна балконска врата. Осомничениот од огнено оружје – пиштол „Црвена застава“ со калибар 7,65 мм со пригушувач испукал 11 куршуми, а неговиот соучесник со пиштол од ист калибар уште 8 куршуми во правец кон оштетените. Од куршумите, три завршиле во телото на сега починатиот, нанесувајќи му смртоносни повреди, соопшти Обвинителството.

Грчките истражни органи имаа издадено налог за апсење на осомничениот, како и Европски налог за апсење и меѓународна потерница поради сомненија за кривични дела – Намерно убиство со соучесништво и Обид за сериско и соучесничко убиство на територијата на Грција, но со оглед на тоа што станува збор за македонски државјанин за кого не постои можност за екстрадиција, грчките власти го отстапиле кривичното гонење на Основното јавно обвинителство Скопје.

Јавниот обвинител до Кривичниот суд Скопје доставил предлог за определување мерка притвор за осомничениот.

На почетокот на оваа година грчките медиуми објавија дека идентификуван е убиецот на Оки и дека станува збор за истото лице што е осомничено за двојното убиство што се случи во март минатата година во „Шиша бар“ кога беа убиени Јетон Кривањева – Жила и Енес Исеинов-Љаци, припадници на истата група и блиски соработници на Оки.

Дел од албанските медиуми тогаш објавија дека станува збор за Гани Марку, припадник на нарко групата „Барон“.

Тој беше уапсен на 8 август минатата година и се сомничи дека учествувал во купопродажбата на автомобилот „Ауди“, односно возилото со кое убијците дошле до „Шиша бар“ , а потоа го запалиле.

Гани Марку го сменил презимето, односно претходно се презивал Туша. Се барал со меѓународна потерница и е повратник од боиштата во Сирија, поточно припадник на групата Ал Нусра.

Од официјалните и неофицијалните информации може да се заклучи дека осомничени за убиството во „Шиша бар“ се припадници на групата „Барон“, новоформирана група блиска до ривалската група на „Дуќанџик“, „Беланоца“.

Истрагата во Грција ја открила рутата на сторителите при нивното бегство, а на оддалеченост од неколку стотини метри од вилата, во непроодна област, бил пронајден пиштолот со придушувач и шаржер, волнена капа и ракавици со траги од барут.

-Според собраните информации, се чини дека мотивот на кривичното дело е поврзан со ривалство помеѓу две криминални групи кои главно се занимаваат со трговија со дрога и се со седиште во земјата од каде што потекнуваат, соопштија грчките истражни органи.

Инаку, Марку е во притвор за поврзаност со убиството во „Шиша бар“, но според информациите на „Слободен печат“, Апелација ја укинала првостепената пресуда и го вратила предметот на повторено судење. Притворот веќе не може да се продолжува бидејќи истекува максималниот рок, па сега се бара да му се определи притвор како осомничен за убиството на Оки.