Италијанскиот регулатор за конкуренција отвори истрага против Рајанер за можна злоупотреба на доминантната позиција што предизвика „сериозна и непоправлива“ штета на туристичките агенции, другите превозници и патниците, објави во понеделникот весникот ИлМесаџеро, пишува Хина.

Во неколку наврати, Рајанер блокираше физички и онлајн тур-оператори да пристапат до понуди и попусти на неговата веб-страница, откри регулаторот. Официјалната одлука треба да биде објавена во текот на денот. Портпаролот на Рајанер во Италија не беше веднаш достапен за коментар за извештајот. Ирскиот превозник има најголем удел на италијанскиот пазар, покажуваат податоците на регулаторот.

Најголемата европска авиокомпанија по број на патници има рок од осум дена да одговори на одлуката на регулаторот. Нејзините претставници најверојатно ќе се сретнат со претставници на агенцијата во втората половина на неделата, пишува Ил Месаџеро. Доколку Рајанер не понуди убедливи аргументи за своите постапки, ќе мора да ги отстрани сите пречки што ги поставува за туристичките агенции и конкурентите, додава весникот.