Министерството за економија нема да ја продолжи мерката за гарантирани цени што завршува на крајот на месецов, туку, како што најави ресорниот министер Крешник Бектеши, ќе го чека носењето на законот за забрана на нефер трговски практики со кој, според него, ќе се стави ред во нелојалната конкуренција во трговијата и ќе доведе до намалување на цените на прехранбените производи. Крајот на мерката, всушност, се совпаѓа со зголемувањето на домашното производство на зеленчук и со велигденските пости, со што на пазарот се зголемува понудата, а се намалува побарувачката. Во изминатите две години беа донесени десет одлуки за замрзнување на цените.

– Очекуваме ова законско решение, кое е целосно усогласено со европската регулатива и е со европско знаменце, да биде усвоено во најкраток можен рок. Со законот очекуваме да се намалат цените на прехранбените и на земјоделските производи – изјави Бектеши за МИА.

Министерството за економија лани на 20 септември донесе Одлука за изменување на одлуката за посебни услови за трговија на одделни стоки, определување највисоки цени на одделни производи во трговијата на мало, како и обврска трговците да прибавуваат и да продаваат определени видови и количество одделна стока на потрошувачите според определен редослед. Одлуката беше објавена во „Службен“ весник и важи до 29 февруари годинава. Бизнисмените уште на почетокот на мерката рекоа дека таа се коси со пазарната економија, а на Владата ѝ порачаа дека не смее да носи вакви мерки во иднина, без да се пресметаат загубите по работењето на компаниите.

Од први март ознаката „гарантирана цена“ ќе биде отстранета од голем број артикли – ориз, брашно, бел и полубел леб, тестенини, млеко и млечни производи, месо и сувомесни производи, јајца, бисквити, пијалаци…