По отстранување на неколку административни пречки, продолжува изградбата на новата детска градинка која се гради во населбата Стопански Двор во општина Ѓорче Петров.

Новата градинка ќе има капацитет за повеќе од 100 деца, од кои околу 30 дечиња на возраст од 0 до 2 години ќе бидат сместени во јаслени групи на приземјето, а останатите ќе бидат распределени во четири занимални на првиот кат. Објектот се простира на вкупна површина од 898 м², распоредени на приземје и кат, со современи услови за згрижување, игра и развој на најмладите жители на општината, информираат од Општината.

Со изградбата на оваа градинка во Стопански Двор правиме значителен чекор кон решавање на долгогодишниот проблем со недостиг на капацитети за згрижување деца во Ѓорче Петров. Посветени сме кон целосна елиминација на листите на чекање и обезбедување сигурно и квалитетно предучилишно образование за секое дете. Продолжуваме да инвестираме таму каде што е најважно – во иднината на нашите деца, истакна, градоначалникот Александар Стојкоски, кој денеска направи увид во градежните работи на овој објект.